Fall of Troy
Choose a text
id="mobileReaderAuthor" class="mobile-reader-author" href="/authors/quintus-smyrnaeus" aria-label="More works by Quintus Smyrnaeus">
—
⋯
Original / primary: Perseus Grc2
8.1
ἦμος δʼ ἠελίοιο φάος περικίδνατο γαῖαν
8.2
ἐκ περάτων ἀνιόντος, ὅθι σπέος Ἠριγενείης,
8.3
δὴ τότε που Τρῶες καὶ Ἀχαιῶν ὄβριμοι υἷες
8.4
θωρήσσονθʼ ἑκάτερθεν ἐπειγόμενοι ποτὶ δῆριν·
8.5
καὶ τοὺς μὲν πάϊς ἐσθλὸς Ἀχιλλέος ὀτρύνεσκεν
8.6
ἀντιάαν Τρώεσσιν ἀταρβέα θυμὸν ἔχοντας,
8.7
τοὺς δʼ ἄρα Τηλεφίδαο μέγα σθένος· ἦ γὰρ ἐώλπει
8.8
τεῖχος μὲν χαμάδις βαλέειν νῆάς τʼ ἀμαθῦναι
8.9
ἐν πυρὶ λευγαλέῳ, λαοὺς δʼ ὑπὸ χερσὶ δαΐξαι.
8.10
ἀλλά οἱ ἐλπωρὴ μὲν ἔην ἐναλίγκιος αὔρῃ
8.11
μαψιδίῃ· κῆρες δὲ μάλα σχεδὸν ἑστηυῖαι
8.12
πολλὸν καγχαλάσκον ἐτώσια μητιόωντι.
8.13
καὶ τότε Μυρμιδόνεσσιν Ἀχιλλέος ἄτρομος υἱὸς
8.14
θαρσαλέον φάτο μῦθον ἐποτρύνων πονέεσθαι·
8.15
κέκλυτέ μευ, θεράποντες, ἀρήϊον ἐν φρεσὶ θυμὸν
8.16
θέντες, ἵνʼ Ἀργείοισιν ἄκος πολέμου ἀλεγεινοῦ
8.17
δυσμενέεσσι δὲ πῆμα γενώμεθα· μηδέ τις ἡμέων
8.18
ταρβείτω· κρατερὴ γὰρ ἄδην ἐκ θάρσεος ἀλκὴ
8.19
γίνεται ἀνθρώποισι· δέος δὲ βίην ἀμαθύνει
8.20
καὶ νόον· ἀλλʼ ἄγε πάντες ἐς Ἄρεα καρτύνασθε,
8.21
ὄφρα μὴ ἀμπνεύσῃ Τρώων στρατός, ἀλλʼ Ἀχιλῆα
8.22
φαίη ἔτι ζώοντα μετέμμεναι Ἀργείοισιν.
8.23
ὣς εἰπὼν ὤμοισι πατρώια δύσατο τεύχη
8.24
πάντοθε μαρμαίροντα· Θέτις δʼ ἠγάλλετο θυμῷ
8.25
ἐξ ἁλὸς εἰσορόωσα μέγα σθένος υἱωνοῖο.
8.26
καί ῥα θοῶς οἴμησε πρὸ τείχεος αἰπεινοῖο
8.27
ἐμβεβαὼς ἵπποισιν ἑοῦ πατρὸς ἀθανάτοισιν·
8.28
οἷος δʼ ἐκ περάτων ἀναφαίνεται ὠκεανοῖο
8.29
ἠέλιος θηητὸν ἐπὶ χθόνα πῦρ ἀμαρύσσων,
8.30
πῦρ, ὅτε οἱ πώλοισι καὶ ἅρματι συμφέρετʼ ἀστὴρ
8.31
Σείριος, ὅς τε βροτοῖσι φέρει πολυκηδέα νοῦσον·
8.32
τοῖος ἐπὶ Τρώων στρατὸν ἤιεν ὄβριμος ἥρως
8.33
υἱὸς Ἀχιλλῆος· φόρεον δέ μιν ἄμβροτοι ἵπποι,
8.34
τούς οἱ ἐελδομένῳ νηῶν ἄπο λαὸν ἐλάσσαι
8.35
ὤπασεν Αὐτομέδων· ὃς γάρ σφεας ἡνιόχευεν·
8.36
ἵπποι δʼ αὖτʼ ἐχάρησαν ἑὸν φορέοντες ἄνακτα
8.37
εἴκελον Αἰακίδῃ· τῶν δʼ ἄφθιτον ἦτορ ἐώλπει
8.38
ἔμμεναι ἀνέρα κεῖνον Ἀχιλλέος οὔτι χερείω.
8.39
ὣς δὲ καὶ Ἀργεῖοι μέγα καγχαλόωντες ἄγερθεν
8.40
ἀμφὶ Νεοπτολέμοιο βίην ἄμοτον μεμαῶτες
8.41
λευγαλέοις σφήκεσσιν ἐοικότες, οὕς τε κλονήσῃ
8.42
χηραμοῦ ἐκποτέονται, ἐελδόμενοι χρόα θεῖναι
8.43
ἀνδρόμεον, πάντες δὲ περὶ στέγος ὁρμαίνοντες
8.44
τεύχουσιν μέγα πῆμα παρεσσυμένοισι βροτοῖσιν
8.45
ὣς οἵ γʼ ἐκ νηῶν καὶ τείχεος ἐξεχέοντο
8.46
μαιμώωντες Ἄρηι· πολὺς δʼ ἐστείνετο χῶρος.
8.47
πᾶν πεδίον δʼ ἀπάνευθεν ἐλάμπετο τεύχεσι φωτῶν
8.48
ἠελίου καθύπερθεν ἀπείριτα μαρμαίροντος·
8.49
οἷον δὲ νέφος εἶσι διʼ ἠέρος ἀπλήτοιο
8.50
πνοιῇσιν μεγάλῃσιν ἐλαυνόμενον Βορέαο,
8.51
ἦμος δὴ νιφετός τε πέλει καὶ χείματος ὥρη
8.52
ἀργαλέη, πάντῃ δὲ περιστέφει οὐρανὸν ὄρφνη·
8.53
ὣς τῶν πλήθετο γαῖα συνερχομένων ἑκάτερθε
8.54
νηῶν βαιὸν ἄπωθε· κόνις δʼ εἰς οὐρανὸν εὐρὺν
8.55
πέπτατʼ ἀειρομένη· κανάχιζε δὲ τεύχεα φωτῶν,
8.56
σὺν δὲ καὶ ἅρματα πολλά· διεσσύμενοι δʼ ἐπὶ μῶλον
8.57
ἵπποι ἐπεχρεμέτιζον· ἐὴ δʼ ἐκέλευεν ἔκαοτον
8.58
ἀλκὴ ἀνιηρὴν ἐς φύλοπιν ὀτρύνουσα.
8.59
ὡς δʼ ὅτε κύματα μακρὰ δύο κλονέουσιν ἀῆται
8.60
σμερδαλέον βρομέοντες ἀνὰ πλατὺ χεῦμα θαλάσσης
8.61
ἔκποθεν ἀλλήλοισι περιρρηγνύντες ἀέλλας,
8.62
ὁππότε χεῖμʼ ἀλεγεινὸν ἀν̔ εὐρέα βένθεα πόντου
8.63
μαίνετʼ, ἀμαιμακέτη δὲ περιστένει Ἀμφιτρίτη
8.64
κύμασι λευγαλέοισι, τὰ δʼ ἄλλοθεν ἄλλα φέρονται
8.65
οὔρεσιν ἠλιβάτοισιν ἐοικότα, τῶν δʼ ἀλεγεινὴ
8.66
ὀρνυμένων ἑκάτερθε πέλει κατὰ πόντον ἰωή·
8.67
ὣς οἳ γʼ ἀμφοτέρωθεν ἐπʼ Ἄρεα συμφορέοντο
8.68
σμερδαλέον μεμαῶτες· ἔρις δʼ ὀρόθυνε καὶ ἀλκὴ.
8.69
σὺν δʼ ἔβαλον βροντῇσιν ἐοικότες ἤ στεροπῇσιν,
8.70
αἵ τε μέτα κτυπέουσι διʼ ἠέρος, ὁππότʼ ἀῆται
8.71
λάβροι ἐριδμαίνωσι, καὶ ὁππότε λάβρον ἀέντες
8.72
σὺν νέφεα ῥήξωσι Διὸς μέγα χωομένοιο
8.73
ἀνδράσιν, οἵ τʼ ἐρίτιμον ὑπὲρ Θέμιν ἔργα κάμωνται·
8.74
ὣς οἵ γʼ ἀλλήλοισιν ἐπέχραον· ἔγχεϊ δʼ ἔγχος
8.75
συμφέρετʼ, ἀσπίδι δʼ ἀσπίς, ἐπʼ ἀνέρα δʼ ἤιεν ἀνὴρ.
8.76
πρῶτος δʼ ὄβριμος υἱὸς ἐϋπτολέμου Ἀχιλῆος
8.77
δάμνατʼ ἐῢν Μελανῆα καὶ ἀγλαὸν Ἀλκιδάμαντα
8.78
υἷας Ἀλεξινόμοιο δαΐφρονος, ὅς τʼ ἐνὶ κοίλῃ
8.79
Καύνῳ ναιετάασκε διειδέος ἀγχόθι λίμνης
8.80
Ἴμβρῳ ὑπὸ νιφόεντι παραὶ ποσὶ Ταρβήλοιο.
8.81
κτεῖνε δὲ Κασσάνδροιο θοὸν ποσὶ παῖδα Μένητα,
8.82
ὃν τέκε δῖα Κρέουσα παρὰ προχοῇς ποταμοῖο
8.83
Λίνδου ἐϋρρείταο, μενεπτολέμων ὅθι Καρῶν
8.84
πείρατα καὶ Λυκίης ἐρικύδεος ἄκρα πέλονται.
8.85
εἷλε δʼ ἄρʼ αἰχμητῆρα Μόρυν Φρυγίηθε μολόντα·
8.86
τῷ δʼ ἄρʼ ὁμῶς Πόλυβόν τε καὶ Ἱππομέδοντα κατέκτα,
8.87
τὸν μὲν ὑπὸ κραδίην, τὸν δʼ ἐς κληῖδα τυχήσας·
8.88
δάμνατο δʼ ἄλλοθεν ἄλλον· ἐπέστενε δʼ αἶα νέκυσσι
8.89
Τρώων· οἱ δʼ ὑπόεικον ἐοικότες αὐαλέοισι
8.90
θάμνοις, οὓς ὀλοοῖο πυρὸς κατεδάμνατʼ ἀϋτμὴ
8.91
ῥηιδίως ἐπιόντος ὀπωρινοῦ Βορέαο·
8.92
ὣς τοῦ ἐπεσσυμένοιο κατηρείποντο φάλαγγες.
8.93
Αἰνείας δʼ ἐδάμασσεν Ἀριστόλοχον μενεχάρμην
8.94
πλήξας χερμαδίῳ κατὰ κράατος· ἐν δʼ ἄρʼ ἔθλασσεν
8.95
ὀστέα σὺν πήληκι· λίπεν δʼ ἄφαρ ὀστέα θυμός.
8.96
Τυδείδης δʼ Εὔμαιον ἕλεν θοόν, ὅς ῥά τʼ ἔναιε
8.97
Δάρδανον αἰπήεσσαν, ἵνʼ Ἀγχίσαο πέλονται
8.98
εὐναί, ὅπου Κυθέρειαν ἐν ἀγκοίνῃσι δάμασσεν.
8.99
ἔνθʼ Ἀγαμέμνων κτεῖνεν ἐῢν Στράτον· οὐδʼ ὅ γε Θρῄκην
8.100
ἵκετʼ ἀπὸ πτολέμοιο, φίλης δʼ ἑκὰς ἔφθιτο πάτρης.
8.101
Μηριόνης δʼ ἐδάμασσε Χλέμον Πεισήνορος υἷα
8.102
ἀντιθέου Γλαύκοιο φίλον καὶ πιστὸν ἑταῖρον
8.103
ὅς ῥά τε ναιετάασκε παρὰ προχοῇς Λιμυροῖο,
8.104
καί ῥά μιν ὡς βασιλῆα περικτίονες τίον ἄνδρες
8.105
Γλαύκου ἀποκταμένοιο καὶ οὐκέτι κοιρανέοντος,
8.106
πάντες, ὅσοι Φοίνικος ἕδος περὶ πάγχυ νέμοντο
8.107
αἰπύ τε Μασσικύτοιο ῥίον ῥωχμόν τε Χιμαίρης.
8.108
ἄλλος δʼ ἄλλον ἔπεφνε κατὰ μόθον· ἐν δʼ ἄρα τοῖσιν
8.109
Εὐρύπυλος πολέεσσι κακὰς ἐπὶ κῆρας ἴαλλε
8.110
δυσμενέσιν· πρῶτον δὲ μενεπτόλεμον κατέπεφνεν
8.111
Εὔρυτον, αὐτάρ ἔπειτα Μενοίτιον αἰολομίτρην,
8.112
ἀντιθέους ἑτάρους Ἐλεφήνορος· ἀμφὶ δʼ ἄρα σφὶν
8.113
Ἅρπαλον, ὅς ῥʼ Ὀδυσῆος ἐΰφρονος ἔσκεν ἑταῖρος·
8.114
ἀλλʼ ὁ μὲν οὖν ἀπάτερθεν ἔχεν πόνον, οὐδʼ ἐπαμύνειν
8.115
ἔσθενεν ᾧ θεράποντι δεδουπότι· τοῦ δʼ ἄρʼ ἐταῖρος
8.116
Ἄντιφος ὀβριμόθυμος ἀποκταμένοιο χολώθη,
8.117
καὶ βάλεν Εὐρυπύλοιο καταντίον· ἀλλά μιν οὔτι
8.118
οὔτασεν, οὕνεκά οἱ κρατερόν δόρυ τυτθὸν ἄπωθεν
8.119
ἔμπεσε Μελανίωνι δαΐφρονι, τόν ποτε μήτηρ
8.120
γείνατο πὰρ προχοῇσιν ἐϋρρείταο Καΐκου
8.121
Κλείτη καλλιπάρῃος ὑποδμηθεῖσʼ Ἐρυλάῳ.
8.122
Εὐρύπυλος δʼ ἑτάροιο χολωσάμενος κταμένοιο
8.123
Ἀντίφῳ αἷψʼ ἐπόρουσεν· ὁ δʼ ἔκφυγε ποσσὶ θοοῖσιν
8.124
ἐς πληθὺν ἑτάρων· κρατερὸν δέ μιν οὔτι δάμασσεν
8.125
ἔγχος Τηλεφίδαο δαΐφρονος, οὕνεκʼ ἔμελλεν
8.126
ἀργαλέως ὀλέεσθαι ὑπʼ ἀνδροφόνοιο Κύκλωπος
8.127
ὕστερον· ὣς γάρ που στυγερῇ ἐπιήνδανε Μοίρῃ.
8.128
Εὐρύπυλος δʼ ἑτέρωθεν ἐπῴχετο· τοῦ δʼ ὑπὸ δουρὶ
8.129
αἰὲν ἐπεσσυμένοιο κατήριπε πουλὺς ὅμιλος·
8.130
ἠΰτε δένδρεα μακρὰ βίῃ δμηθέντα σιδήρου
8.131
οὔρεσιν ἐν λασίοισιν ἀναπλήσωσι φάραγγας
8.132
κεκλιμένʼ ἄλλοθεν ἄλλα κατὰ χθονός· ὣς ἄρʼ Ἀχαιοὶ
8.133
δάμναντʼ Εὐρυπύλοιο δαΐφρονος ἐγχείῃσι,
8.134
μέσφʼ ὅτε οἱ κίεν ἄντα μέγα φρονέων ἐνὶ θυμῷ
8.135
υἱὸς Ἀχιλλῆος. τώ δʼ ἄμφω δούρατα μακρὰ
8.136
ἐν παλάμῃσι τίνασσον ἐπί σφισι μαιμώωντες·
8.137
Εὐρύπυλος δέ ἑ πρῶτος ἀνειρόμενος προσέειπε·
8.138
τίς πόθεν εἰλήλουθας ἐναντίον ἄμμι μάχεσθαι;
8.139
ἦ σε πρὸς Ἄϊδα Κῆρες ἀμείλικτοι φορέουσιν·
8.140
οὐ γάρ τίς μʼ ὑπάλυξεν ἐν ἀργαλέῃ ὑσμίνῃ·
8.141
ἀλλά μοι ὅσσοι .ἔναντα λιλαιόμενοι μαχέσασθαι
8.142
δεῦρο κίον, πάντεσσι φάνον στονόεντʼ ἐφέηκα
8.143
ἀργαλέως, πάντων δὲ παρὰ Ξάνθοιο ῥέεθρα
8.144
ὀστέα τε σάρκας τε κύνες διὰ πάντʼ ἐδάσαντο.
8.145
ἀλλά μοι εἰπέ, τίς ἐσσι, τίνος δʼ ἐπαγάλλεαι ἵπποις;
8.146
ὣς φάμενον προσέειπεν Ἀχιλλέος ὄβριμος υἱός·
8.147
τίπτε μʼ ἐπισπεύσοντα ποτὶ κλόνον αἱματόεντα
8.148
ἐχθρὸς ἐὼν ὡς εἴ τε φίλα φρονέων ἐρεείνεις
8.149
εἰπέμεναι γενεήν, ἥνπερ μάλα πολλοὶ ἴσασιν;
8.150
υἱὸς Ἀχιλλῆος κρατερόφρονος, ὅς τε τοκῆα
8.151
σεῖο πάροιθʼ ἐφόβησε βαλὼν περιμήκεϊ δουρί·
8.152
καί νύ κέ μιν θανάτοιο κακαὶ περὶ Κῆρες ἔμαρψαν,
8.153
εἰ μή οἱ στονόεντα θοῶς ἰήσατʼ ὄλεθρον.
8.154
ἵπποι δʼ , οἳ φορέουσιν, ἐμοῦ πατρὸς ἀντιθέοιο,
8.155
οὓς τέκεθʼ Ἅρπυια Ζεφύρῳ πάρος εὐνηθεῖσα,
8.156
οἵ τε καὶ ἀτρύγετον πέλαγος διὰ ποσσὶ θέουσιν
8.157
ἀκρονυχὶ ψαύοντες, ἴσον δʼ ἀνέμοισι φέρονται.
8.158
νῦν δʼ ἐπεὶ οὖν γενεὴν ἐδάη ἵππων τε καὶ αὐτοῦ,
8.159
καὶ δόρατος πείρησαι ἀτειρέος ἡμετέροιο
8.160
γνώμεναι ἄντα βίην· γενεὴ δέ οἱ ἐν κορυφῇσι
8.161
Πηλίου αἰπεινοῖο τομὴν ὅθι λεῖπε καὶ ὕλην.
8.162
ἦ ῥα καὶ ἐξ ἵππων χαμάδις θόρε κύδιμος ἀνήρ
8.163
πάλλων ἐγχείην περιμήκετον· ὃς δʼ ἑτέρωθεν
8.164
χερσὶν ὑπὸ κρατερῇσιν ἀπειρεσίην λάβε πέτρην,
8.165
καί ῥα Νεοπτολέμοιο κατʼ ἀσπίδος ἧκε φέρεσθαι
8.166
χρυσείης. τὸν δʼ οὔτι προσεσσυμένη στυφέλιξεν,
8.167
ἀλλʼ ἅτε πρὼν εἱστήκει ἀπείριτος οὔρεϊ μακρῷ,
8.168
τόν ῥα διιπετέων ποταμῶν μένος οὐδʼ ἅμα πάντων
8.169
ἄψ ὦσαι δύναται, ὁ γὰρ ἔμπεδον ἐρρίζωται·
8.170
ὣς μένεν ἄτρομος αἰὲν Ἀχιλλέος ὄβριμος υἱός.
8.171
ἀλλʼ οὐδʼ ὣς τάρβησε θρασὺ σθένος Εὐρυπύλοιο
8.172
ἄσχετον υἷʼ Ἀχελῆος, ἐπεί ῥά μιν ὀτρύνεσκε
8.173
θάρσος ἐὸν καὶ κῆρες· ὑπὸ κραδίῃσι δὲ θυμὸς
8.174
ἔζεεν ἀμφοτέροισι· περὶ σφίσι δʼ αἰόλα τεύχη
8.175
ἔβραχεν· οἱ δʼ ἅτε θῆρες ἐπῄεσαν ἀλλήλοισι
8.176
σμερδαλέοι, τοῖσίν τε κατʼ οὔρεα δῆρις ἀέξει,
8.177
ὁππότε λευγαλέῳ λιμῷ βεβολημένοι ἦτορ
8.178
ἢ βοὸς ἢ ἐλάφοιο περὶ κταμένου πονέωνται
8.179
ἄμφω παιφάσσοντες, ἐπικτυπέουσι δὲ βῆσσαι
8.180
μαρναμένων· ὣς οἴ γε συνῄεσαν ἀλλήλοισι
8.181
δῆριν συμφορέοντες ἀμείλιχον. ἀμφὶ δὲ μακραὶ
8.182
λαῶν ἀμφοτέρωθεν ἄσην πονέοντο φάλαγγες
8.183
ἐς μόθον· ἀργαλέη δὲ περὶ σφίσι δῆρις ὀρώρει.
8.184
οἱ δʼ ἀνέμων ῥιπῇσιν ἐοικότες αἰψηρῇσι
8.185
σύν ῥʼ ἔβαλον μελίῃσι μεμαότες αἷμα κεδάσσαι
8.186
ἀλλήλων· τοὺς δʼ αἰὲν ἐποτρύνεσκεν Ἐνυὼ
8.187
ἐγγύθεν ἱσταμένη· τοὶ δʼ οὐκ ἀπέληγον ὀμοκλῆς,
8.188
ἀλλά σφεας ἐδάϊζον ἐς ἀσπίδας, ἄλλοτε δʼ αὖτε
8.189
οὔταζον κνημῖδας ἰδʼ ὑψιλόφους τρυφαλείας·
8.190
καί τις καὶ χροὸς ἥψατʼ ἐπεὶ πόνος αἰνὸς ἔπειγε
8.191
θαρσαλέους ἥρωας· ἔρις δʼ ἐπετέρπετο θυμῷ
8.192
κείνους εἰσορόωσα· πολὺς δʼ ἐξέρρεεν ἱδρὼς
8.193
ἀμφοτέρων· οἱ δʼ αἰὲν ἐκαρτύνοντο μένοντες·
8.194
ἄμφω γὰρ μακάρων ἔσαν αἵματος· οἱ δʼ ἀπʼ Ὀλύμπου—
8.195
οἱ μὲν γὰρ κύδαινον Ἀχιλλέος ὄβριμον υἷα,
8.196
οἱ δʼ αὖτʼ Εὐρύπυλον θεοειδέα· τοὶ δʼ ἑκάτερθεν
8.197
μάρναντʼ ἀκμήτοισιν ἐειδόμενοι σκοπέλοισιν
8.198
ἠλιβάτων ἀρέων· μέγα δʼ ἔβραχον ἀμφοτέρωθεν
8.199
θεινόμεναι μελίῃσι θάμʼ ἀσπίδες· ὀψὲ δὲ μακρὴ
8.200
Πηλιὰς Εὐρυπύλοιο διήλυθεν ἀνθερεῶνος
8.201
πολλὰ πονησαμένη· τοῦ δʼ ἔκχυτο φοίνιον αἷμα
8.202
ἐσσυμένως· ψυχὴ δὲ διʼ ἕλκεος ἐξεποτήθη
8.203
ἐκ μελέων ὀλοὴ δὲ κατʼ ὀφθαλμῶν πέσεν ὄρφνη.
8.204
ἤριπε δʼ ἐν τεύχεσσι κατὰ χθονός, ἠΰτε βλωθρὴ
8.205
ἢ πίτυς ἤ ἐλάτη κρυεροῦ Βορέαο βίηφιν
8.206
ἐκ ῥιζέων ἐριποῦσα· τόσην ἐπικάππεσε γαῖαν
8.207
Εὐρυπύλοιο δέμας· μέγα δʼ ἔβραχε Τρώιον οὖδας
8.208
καὶ πεδίον. Χλοερὴ δὲ θοῶς κατεχεύατο νεκρῷ
8.209
ἀχροίη καὶ καλὸν ἀπημάλδυνεν ἔρευθος.
8.210
τῷ δʼ ἐπικαγχαλόων μεγάλʼ εὔχετο καρτερός ἥρως·
8.211
Εὐρύπυλʼ, ἦπου ἔφης Δαναῶν νέας ἠδὲ καὶ αὐτοὺς
8.212
δῃώσειν καὶ πάντας ἀϊζυρῶς ἀπολέσσειν
8.213
ἡμέας· ἀλλὰ σοὶ οὔτι θεοὶ τελέεσκον ἐέλδωρ,
8.214
ἀλλʼ ὑπʼ ἐμοί δʼ ἐδάμασσε καὶ ἀκάματόν περ ἐόντα
8.215
πατρὸς ἐμοῖο μέγʼ ἔγχος, ὅπερ βροτὸς οὔτις ἀλύξει
8.216
ἡμῖν ἄντα μολὼν οὐδʼ εἰ παγχάλκεος ἦεν.
8.217
ἦ ῥα καὶ ἐκ νέκυος περιμήκετον εἴρυσεν αἰχμὴν
8.218
ἐσσυμένως· Τρῶες δὲ μέγʼ ἔτρεσαν εἰσορόωντες
8.219
ἀνέρα καρτερόθυμον· ὁ δʼ αὐτίκα τεύχἐ ἀπούρας
8.220
δῶκε θοοῖς ἑτάροισι φέρειν ποτὶ νῆας Ἀχαιῶν·
8.221
αὐτὸς δʼ ἐς θοὸν ἅρμα θορὼν καὶ ἀτειρέας ἵππους
8.222
ἤιεν, οἷός τʼ εἶσι διʼ αἰθέρος ἀπλήτοιο
8.223
ἐκ Διὸς ἀκαμάτοιο σὺν ἀστεροπῇσι κεραυνός,
8.224
ὅν τε περιτρομέουσι καὶ ἀθάνατοι κατιόντα
8.225
νόσφι Διὸς μεγάλοιο, ὁ δʼ ἐσσύμενος ποτὶ γαῖαν
8.226
δένδρεά τε ῥήγνυσι καὶ οὔρεα παιπαλόεντα·
8.227
ὣς ὁ θοῶς Τρώεσσιν ἐπέσσυτο πῆμα κορύσσων·
8.228
δάμνατο δʼ ἄλλοθεν ἄλλος, ὅσους κίχον ἄμβροτοι ἵπποι·
8.229
πλήθετο δὲ χθονὸς οὖδας, ἄδην δʼ ἐρυθαίνετο λύθρῳ.
8.230
ὡς δʼ ὅτε μυρία φύλλα κατʼ οὔρεος ἐν βήσσῃσι
8.231
ταρφέα πεπτηῶτα χυτὴν κατὰ γαῖαν ἐρέψῃ·
8.232
ὣς Τρώων τότε λαὸς ἀάσπετος ἐν χθονὶ κεῖτο
8.233
χερσὶ Νεοπτολέμοιο καὶ Ἀργείων ἐριθύμων,
8.234
ὧν ἄπλετον μετὰ χερσὶν ὑπέρρεεν αἷμα κελαινὸν
8.235
ἀνδρῶν ἠδʼ ἵππων· μάλα δʼ ἄντυγες ἀμφʼ ὀχέεσσι
8.236
κινύμεναι δεύοντο περὶ στροφάλιγξιν ἑῇσι.
8.237
καί νύ κε Τρώιοι υἷες ἔσω πυλέων ἀφίκοντο,
8.238
πόρτιες εὖτε λέοντα φοβεύμεναι ἢ σύες ὄμβρον,
8.239
εἰ μὴ Ἄρης ἀλεγεινὸς ἀρηγέμεναι μενεαίνων
8.240
Τρωσὶ φιλοπτολέμοισι κατήλυθεν Οὐλύμποιο
8.241
κρύβδʼ ἄλλων μακάρων· φόρεον δέ μιν ἐς μόθον ἵπποι
8.242
αἴθων καὶ Φλόγιος, Κόναβος δʼ ἐπὶ τοῖσι Φόβος τε,
8.243
τοὺς Βορέῃ κελάδοντι τέκε βλοσυρῶπις Ἐριννὺς
8.244
πῦρ ὀλοὸν πνείοντας· ὑπέστενε δʼ αἰόλος αἰθὴρ
8.245
ἐσσυμένων ποτὶ δῆριν. ὁ δʼ ὀτραλέως ἀφίκανεν
8.246
ἐς Τροίην· ὑπὸ δʼ αἶα μέγʼ ἔκτυπε θεσπεσίοισιν
8.247
ἵππων ἀμφὶ πόδεσσι· μολὼν δʼ ἄγχιστα κυδοιμοῦ
8.248
πῆλε δόρυ βριαρόν· μέγα δʼ ἴαχε Τρωσὶ κελεύων
8.249
ἀντιάαν δηίοισι κατὰ κλόνον· οἱ δʼ ἀΐοντες
8.250
θεσπεσίην ὄπα πάντες ἐθάμβεον· οὐ γὰρ ἴδοντο
8.251
ἄμβροτον ἀθανάτοιο θεοῦ δέμας οὐδὲ μὲν ἵππους·
8.252
ἠέρι γὰρ κεκάλυπτο. νόησε δὲ θέσκελον αὐδὴν
8.253
ἔκποθεν ἀΐσσουσαν ἄδην εἰς οὔατα Τρώων
8.254
ἀντιθέου Ἑλένοιο κλυτὸς νόος· ἐν δʼ ἄρα θυμῷ
8.255
γήθησεν καὶ λαὸν ἀπεσσύμενον μέγʼ ἀΰτει·
8.256
ἆ δειλοί, τί φέβεσθε φιλοπτολέμου Ἀχιλῆος
8.257
υἱέα θαρσαλέον; θνητός νύ τίς ἐστι καὶ αὐτός,
8.258
οὐδέ οἱ ἶσον Ἄρηι πέλει σθένος, ὃς μέγʼ ἀρήγει
8.259
ἧμιν ἐελδομένοισι· βοᾷ δʼ ὅ γε μακρὰ κελεύων
8.260
μάρνασθʼ Ἀργείοισι κατὰ κλόνον· ἀλλʼ ἄγε θυμῷ
8.261
τλῆτε φίλοι καὶ θάρσος ἐνὶ στήθεσσι βάλεσθε·
8.262
οὐ γὰρ ἀμείνονα Τρωσὶν ὀΐομαι ἄλλον ἱκέσθαι
8.263
ἀλκτῆρα πτολέμοιο· τί γὰρ ποτὶ δῆριν Ἄρηος
8.264
λώιον, εὖτε βροτοῖσι κορυσσομένοις ἐπαμύνει;
8.265
ὅς νῦν ἦμιν ἵκανεν ἐπίρροθος· ἀλλὰ καὶ αὐτοὶ
8.266
μνήσασθε πτολέμοιο, δέος δʼ ἀπὸ νόσφι βάλεσθε.
8.267
ὣς φάτο· τοὶ δʼ ἵσταντο καταντίον Ἀργείοισιν·
8.268
ἠΰτʼ ἐνὶ ξυλόχοισι κύνες κατέναντα λύκοιο
8.269
φεύγοντες τὸ πάροιθε βίην τρέψωσι μάχεσθαι
8.270
ταρφέα μηλονόμοιο παροτρύνοντος ἔπεσσιν·
8.271
ὣς ἄρα Τρώιοι υἷες ἀνὰ μόθον αἰνὸν Ἄρηος
8.272
δείματος ἐκτὸς ἔσαν· κατὰ δʼ ἀντίον ἀνέρος ἀνὴρ
8.273
μάρνατο θαρσαλέως· περὶ δʼ ἔκτυπεν ἔντεα φωτῶν
8.274
θεινόμενα ξιφέεσσι καὶ ἔγχεσι καὶ βελέεσσιν·
8.275
αἰχμαὶ δʼ ἐς χρόα δῦνον· ἐδεύετο δʼ αἵματι πολλῷ
8.276
δεινὸς Ἄρης· ὀλέκοντο δʼ ἀνὰ μόθον ἄλλος ἐπʼ ἄλλῳ
8.277
μαρναμένων ἑκάτερθε· μάχη δʼ ἔχεν ἶσα τάλαντα.
8.278
ὡς δʼ ὁπότʼ αἰζηοὶ μεγάλης ἀνὰ γουνὸν ἀλωῆς
8.279
ὄρχατον ἀμπελόεντα διατμήξωσι σιδήρῳ
8.280
σπερχόμενοι, τῶν δʼ ἶσον ἀέξεται εἰς ἔριν ἔργον,
8.281
οὕνεκʼ ἴσοι τελέθουσιν ὁμηλικίῃ τε βίῃ τε·
8.282
ὣς τῶν ἀμφοτέρωθε μάχης ἀλεγεινὰ τάλαντα
8.283
ἶσα πέλεν· Τρῶες γὰρ ὑπέρβιον ἐνθέμενοι κῆρ
8.284
μίμνον ἀταρβήτοιο πεποιθότες Ἄρεος ἀλκῇ;
8.285
Ἀργεῖοι δ ἄρα παιδὶ μενεπτολέμου Ἀχιλῆος.
8.286
κτεῖνον δʼ ἀλλήλους· ὀλοὴ δʼ ἀνὰ μέσσον Ἐνυὼ
8.287
στρωφᾶτʼ ἀλγινόεντι λύθρῳ πεπαλαγμένη ὤμους
8.288
καὶ χέρας· ἐκ δέ οἱ αἰνὸς ἀπὸ μέλεων ῥέεν ἱδρώς·
8.289
οὐδʼ ἑτέροισιν ἄμυνεν, ἴσῃ δʼ ἐπετέρπετο χάρμῃ
8.290
ἁζομένη φρεσὶν ᾗσι Θέτιν καὶ δῖον Ἄρηα.
8.291
ἔνθα Νεοπτόλεμος τηλέκλειτον Περιμήδεα
8.292
δάμναθʼ, ὃς οἰκίʼ ἔναιε παρὰ Σμινθήιον ἄλσος·
8.293
τῷ δʼ ἔπι Κέστρον ἔπεφνε μενεπτόλεμόν τε Φάληρον
8.294
καὶ κρατερὸν Περίλαον ἐϋμμελίην τε Μενάλκην,
8.295
ὃν τέκετʼ Ἰφιάνασσα παρὰ ζάθεον πόδα Κίλλης
8.296
τεχνήεντι Μέδοντι δαήμονι τεκτοσυνάων·
8.297
ἀλλʼ ὁ μὲν οἴκοι ἔμιμνε φίλῃ ἐνὶ πατρίδι γαίῃ·
8.298
παιδὸς δʼ οὐκ ἀπόνητο· δόμον δέ οἱ ἔργα τε πάντα
8.299
χηρωσταὶ μετόπισθεν ἀποφθιμένοιο δάσαντο
8.300
Δηίφοβος δὲ Λυκῶνα μενεπτόλεμον κατέπεφνε
8.301
τυτθὸν ὑπὲρ βουβῶνα τυχών· περὶ δʼ ἔγχεϊ μακρῷ
8.302
ἔγκατα πάντʼ ἐχύθησαν· ὅλη δʼ ἐξέσσυτο νηδύς.
8.303
Αἰνείας δὲ Δύμαντα κατέκτανεν, ὃς τὸ πάροιθεν
8.304
Αὐλίδα ναιετάασκε, συνέσπετο δʼ Ἀρκεσιλάῳ
8.305
ἐς Τροίην· ἀλλʼ οὔτι φίλην πάλιν ἔδρακε γαῖαν.
8.306
Εὐρύαλος δʼ ἐδάμασσε βαλὼν ἀλεγεινὸν ἄκοντα
8.307
Ἀστραῖον· τοῦ δʼ αἶψα διὰ στέρνοιο ποτήθη
8.308
αἰχμὴ ἀνιηρή, στομάχου δʼ ἀπέκερσε κελεύθους
8.309
ἀνέρι κῆρα φέρουσα· μίγη δέ οἱ εἴδατα λύθρῳ.
8.310
τοῦ δʼ ἄρα βαιὸν ἄπωθεν ἕλεν μεγάθυμος Ἀγήνωρ
8.311
Ἱππομένην, Τεύκροιο δαΐφρονος ἐσθλὸν ἑταῖρον,
8.312
τύψας ἐς κληῖδα θοῶς· σὺν δʼ αἵματι θυμὸς
8.313
ἔκθορεν ἐκ μελέων· ὀλοὴ δέ μιν ἀμφεχύθη νύξ.
8.314
Τεύκρῳ δʼ ἔμπεσε πένθος ἀποκταμένου ἑτάροιο,
8.315
καὶ βάλεν ὠκὺν ὀϊστὸν Ἀγήνορος ἄντα τανύσσας·
8.316
ἀλλά οἱ οὔτι τύχησεν ἀλευαμένου μάλα τυτθόν·
8.317
ἔμπεσε δʼ ἐγγὺς ἐόντι δαΐφρονι Δηιοφόντῃ
8.318
λαιὸν ἐς ὀφθαλμόν, διὰ δʼ οὔατος ἐξεπέρησε
8.319
δεξιτεροῦ, γλήνην δὲ διέτμαγεν, οὕνεκα Μοῖραι
8.320
ἀργαλέον βέλος ὦσαν ὅπῃ φίλον· ὃς δʼ ἔτι ποσσὶν
8.321
ὀρθὸς ἀνασκαίρεσκε· βαλὼν δʼ ὅ γε δεύτερον ἰὸν
8.322
λαιμῷ ἐπερροίζησε· διέθρισε δʼ αὐχένος ἶνας
8.323
ἄντικρυς ἀΐξας· τὸν δʼ ἀργαλέη κίχε Μοῖρα.
8.324
ἄλλος δʼ ἄλλῳ τεῦχε φόνον· κεχάροντο δὲ Κῆρες
8.325
καὶ Μόρος, ἀλγινόεσσα δʼ Ἔρις μέγα μαιμώωσα
8.326
ἤϋσεν μάλα μακρόν, Ἄρης δέ οἱ ἀντεβόησε
8.327
σμερδαλέον, Τρώεσσι δʼ ἐνέπνευσεν μέγα θάρσος,
8.328
Ἀργείοισι δὲ φύζαν, ἄφαρ δʼ ἐλέλιξε φάλαγγας.
8.329
ἀλλʼ οὐχ υἷα φόβησεν Ἀχιλλέος· ἀλλʼ ὅ γε μίμνων
8.330
μάρνατο θαρσαλέως, ἐπὶ δʼ ἔκτανεν ἄλλον ἐπʼ ἄλλῳ·
8.331
ὡς δʼ ὅτε τις μυίῃσι περὶ γλάγος ἐρχομένῃσι
8.332
χεῖρα περιρρίψῃ κοῦρος νέος, αἱ δʼ ὑπὸ πληγῇ
8.333
τυτθῇ δαμνάμεναι σχεδὸν ἄγγεος Zimmermann, ex. P. ἄλλοθεν ἄλλαι
8.334
θυμὸν ἀποπνείουσι, πάϊς δʼ ἐπιτέρπεται ἔργῳ·
8.335
ὣς ἄρα φαίδιμος υἱὸς ἀμειλίκτου Ἀχιλῆος
8.336
γήθεεν ἀμφὶ νέκυσσι καὶ οὐκ ἀλέγιζεν Ἄρηος
8.337
Τρωσὶν ἐποτρύνοντος· ἐτίνυτο δʼ ἄλλοθεν ἄλλον
8.338
λαοῦ ἐπαΐσσοντος· ὅπως δʼ ἀνέμοιο θυέλλας
8.339
μίμνῃ ἐπεσσυμένας ὄρεος μεγάλοιο κολώνη,
8.340
ὣς ἄρα μίμνεν ἄτρεστος. Ἄρης δέ οἱ ἐμμεμαῶτι
8.341
χώετο, καί οἱ ἔμελλεν ἐναντία δηριάασθαι
8.342
αὐτὸς ἀπορρίψας ἱερὸν νέφος, εἰ μὴ Ἀθήνη
8.343
ἔκποθεν Οὐλύμποιο θόρεν ποτὶ δάσκιον Ἴδην·
8.344
ἔτρεμε δὲ χθὼν δῖα καὶ ἠχήεντα ῥέεθρα
8.345
Ξάνθου· τόσσον ἔσεισε· δέος δʼ ἀμφέκλασε θυμὸν
8.346
νυμφάων, φοβέοντο δʼ ὑπὲρ Πριάμοιο πόληος·
8.347
τεύχεσι δʼ ἀμβροσίοισι περὶ στεροπαὶ ποτέοντο·
8.348
σμερδαλέοι δὲ δράκοντες ἀπʼ ἀσπίδος ἀκαμάτοιο
8.349
πῦρ ἄμοτον πνείεσκον· ἄνω δʼ ἔψαυε νέφεσσι
8.350
θεσπεσίη τρυφάλεια. θοῷ δʼ ἤμελλεν Ἄρηι
8.351
μάρνασθʼ ἐσσυμένως, εἰ μὴ Διὸς ἠῢ νόημα
8.352
ἀμφοτέρους ἐφόβησεν ἀπʼ αἰθέρος αἰπεινεῖο
8.353
βροντήσας ἀλεγεινόν. Ἄρης δʼ ἀπεχάζετο χάρμης·
8.354
δὴ γάρ οἱ μεγάλοιο Διὸς διεφαίνετο θυμός·
8.355
ἵκετο δʼ ἐς Θρῄκην δυσχείμερον, οὐδʼ ἔτι Τρώων
8.356
μέμβλετό οἱ κατὰ θυμὸν ὑπέρβιον· οὐδὲ μὲν ἐσθλὴ
8.357
Παλλὰς ἔτʼ ἐν πεδίῳ Τρώων μένεν, ἀλλὰ καὶ αὐτὴ
8.358
ἷξεν Ἀθηναίων ἱερὸν πέδον. οἱ δʼ ἔτι χάρμης
8.359
μνώοντʼ οὐλομένης· δεύοντο δὲ Τρώιοι υἷες
8.360
ἀλκῆς· Ἀργεῖοι δὲ μέγʼ ἱέμενοι πολέμοιο
8.361
χαζομένοισιν ἕποντο κατʼ ἴχνιον, ἠΰτʼ ἀῆται
8.362
νήεσιν ἐσσυμένῃς ὑπὶ λαίφεσιν εἰς ἁλὸς οἶδμα
8.363
ὄβριμον, ἢ θάμνοισι πυρὸς μένος, ἢ κεμάδεσσιν
8.364
ὀτρηροὶ κατʼ ὄρεσφι κύνες λελιημένοι ἄγρης·
8.365
ὣς Δαναοὶ δηίοισιν ἐπήιον, οὕνεκʼ ἄρʼ αὐτοὺς
8.366
υἱὸς Ἀχιλλῆος μεγάλῳ δορὶ θαρσύνεσκε
8.367
κτείνων ὅν κε κίχῃσι κατὰ κλόνον· οἱ δʼ ἐπὶ φύζαν
8.368
χασσάμενοι κατέδυσαν ἐς ὑψίπυλον πτολίεθρον.
8.369
Ἀργεῖοι δʼ ἄρα τυτθὸν ἀνέπνευσαν πολέμοιο
8.370
ἔλσαντες Πριάμοιο κατὰ πτόλιν ἔθνεα Τρώων,
8.371
ἄρνας ὅπως σταθμοῖσιν ἐπʼ οἰοπόλοισι νομῆες·
8.372
ὡς δʼ ὁπότʼ ἀμπνείωσι βόες μέγα κεκμηῶτες
8.373
ἄχθος ἀνειρύσσαντες ἄνω ποτὶ δύσβατον ἄκρην
8.374
πυκνὸν ἀνασθμαίνοντες ὑπὸ ζυγόν· ὥς ἄρʼ Ἀχαιοὶ
8.375
ἄμπνεον ἐν τεύχεσσι κεκμηκότες. ἀμφὶ δὲ πύργους
8.376
μάρνασθαι μεμαῶτες ἐκυκλώσαντο πόληα·
8.377
οἱ δʼ ἄρʼ ἑῇσι πύλῃσιν ἐπειρύσσαντες ὀχῆας
8.378
ἐν τείχεσσιν ἔμιμνον ἐπεσσυμένων μένος ἀνδρῶν.
8.379
ὡς δʼ ὅτε μηλοβοτῆρες ἐνὶ σταθμοῖσι μένωσι
8.380
λαίλαπα κυανέην, ὅτε χείματος ἦμαρ ἵκηται
8.381
λάβρον ὁμοῦ στεροπῇσι καὶ ὕδατι καὶ νιφάδεσσι
8.382
ταρφέσιν, οἱ δὲ μάλʼ οὔτι λιλαιόμενοί περ ἱκέσθαι
8.383
ἐς νομὸν ἀΐσσουσιν, ἄχρις μέγα λωφήσειε
8.384
χεῖμα καὶ εὐρύποροι ποταμοὶ μεγάλα βρομέοντες·
8.385
ὣς οἵ γʼ ἐν τείχεσσι μένον τρομέοντες ὁμοκλὴν
8.386
δυσμενέων· λαοὶ δὲ θοῶς ἐπέχυντο πόληι.
8.387
ὡς δʼ ὁπότε ψῆρες τανυσίπτεροι ἠὲ κολοιοὶ
8.388
καρπῷ ἐλαϊνέῳ θαμέες περὶ πάγχυ πέσωσι
8.389
βρώμης ἱέμενοι θυμηδέος, οὐδʼ ἄρα τούς γε
8.390
αἰζηοὶ βοόωντες ἀποτρωπῶσι φέβεσθαι,
8.391
πρὶν φαγέειν, λιμὸς γὰρ ἀναιδέα θυμὸν ἀέξει·
8.392
ὣς Δαναοὶ Πριάμοιο τότʼ ἀμφεχέοντο πόληι
8.393
ὄβριμοι· ἐν δὲ πύλῃσι πέσον μεμαῶτες ἐρύσσαι
8.394
ἔργον ἀπειρέσιον κρατερόφρονος Ἐννοσιγαίου.
8.395
Τρῶες δʼ οὐ λήθοντο μάχης μάλα περ δεδιῶτες,
8.396
ἀλλὰ καὶ ὥς πύργοισιν ἐφεσταότες πονέοντο
8.397
νωλεμές· ἰοὶ δʼ αἰὲν ἐϋδμήτων Zimmermann, for θεοδμήτων. ἀπὸ τειχέων
8.398
θρῶσκον ὁμῶς λάεσσι καὶ αἰγανέῃσι θοῇσι
8.399
δυσμενέων ἐς ὅμιλον, ἐπεί σφισι τλήμονα Φοῖβος
8.400
ἧκε βίην· ἔτι γάρ οἱ ἀμύνειν ἤθελε θυμὸς
8.401
Τρωσὶν ἐϋπτολέμοισι καὶ Ἕκτορος οἰχομένοιο.
8.402
Ἔνθʼ ἄρα Μηριόνης στυγερὸν προέηκε βέλεμνον
8.403
καὶ βάλε Φυλοδάμαντα φίλον κρατεροῖο Πολίτεω
8.404
τυτθὸν ὑπὸ γναθμοῖο· πάγη δʼ ὑπὸ λαιμὸν ὀϊστός.
8.405
κάππεσε δʼ αἰγυπιῷ ἐναλίγκιος, ὅν τʼ ἀπὸ πέτρης
8.406
ἰῷ ἐϋγλώχινι βαλὼν αἰζηὸς ὀλέσσῃ·
8.407
ὣς ὁ θοῶς πύργοιο κατήριπεν αἰπεινοῖο·
8.408
γυῖα δέ οἱ λίπε θυμός· ἐπέβραχε δʼ ἔντεα νεκρῷ.
8.409
τῷ δʼ ἐπικαγχαλόων υἱὸς κρατεροῖο Μόλοιο
8.410
ἄλλον ἀφῆκεν ὀϊστὸν ἐελδόμενος μέγα θυμῷ
8.411
υἷα βαλεῖν Πριάμοιο πολυτλήτοιο Πολίτην·
8.412
ἀλλʼ ὁ μὲν αἶψʼ ἀλέεινε παρακλίνας ἑτέρωσε
8.413
ὅν δέμας, οὐδέ οἱ ἰὸς ἐπὶ χρόα καλὸν ἴαψεν·
8.414
ὡς δʼ ὅθʼ ἁλὸς κατὰ βένθος ἐπειγομένης νεὸς οὔρῳ
8.415
ναύτης παιπαλόεσσαν ἰδὼν ἐν χεύματι πέτρην
8.416
νῆα παρατρέψῃ λελιημένος ἐξυπαλύξαι
8.417
χειρὶ παρακλίνας οἰήιον, ᾗχί ἑ θυμὸς
8.418
ὀτρύνει, τυτθὴ δὲ βίη μέγα πῆμʼ ἀπερύκει·
8.419
ὣς ἄρʼ ὅ γε προϊδὼν ὀλοὸν βέλος ἔκφυγε πότμον.
8.420
οἱ δʼ αἰεὶ μάρναντο· λύθρῳ δʼ ἐρυθαίνετο τείχη
8.421
πύργοι θʼ ὑψηλοὶ καὶ ἐπάλξιες, ᾗχί τε Τρῶες
8.422
ἰοῖσι κτείνοντο πολυσθενέων ὑπʼ Ἀχαιῶν·
8.423
οὐδὲ μὲν οἵ γʼ ἀπάνευθε πόνων ἔσαν, ἀλλʼ ἄρα καὶ τῶν
8.424
πολλοὶ γαῖαν ἔρευθον· ὀρώρει δʼ αἰπὺς ὄλεθρος
8.425
βαλλομένων ἑκάτερθε· λυγρὴ δʼ ἐπετέρπετʼ Ἐνυὼ
8.426
δῆριν ἐπικλονέουσα κασιγνήτη Πολέμοιο.
8.427
καί νύ κε δὴ ῥήξαντο πύλας καὶ τείχεα Τροίης
8.428
Ἀργεῖοι, μάλα γάρ σφιν ἀάσπετον ἔπλετο κάρτος,
8.429
εἰ μὴ ἄρʼ αἶψʼ ἐβόησεν ἀγακλειτὸς Γανυμήδης
8.430
οὐρανοῦ ἐκκατιδών· μάλα γὰρ περιδείδιε πάτρης·
8.431
Ζεῦ πάτερ, εἰ ἐτεόν γε τεῆς ἔξ εἰμι γενέθλης,
8.432
σῇσι δʼ ὑπʼ ἐννεσίῃσι λιπὼν ἐρικυδέα Τροίην Zimmermann, ex *w. P.
8.433
εἰμὶ μετʼ ἀθανάτοισι, πέλει δέ μοι ἄμβροτος αἰών,
8.434
τῷ μευ νῦν ἐσάκουσον ἀκηχεμένου μέγα θυμῷ·
8.435
οὐ γὰρ τλήσομαι ἄστυ καταιθόμενον προσιδέσθαι
8.436
οὐδʼ ἄρʼ ἀπολλυμένην γενεὴν ἐν δηιοτῆτι
8.437
λευγαλέῃ, τῆς οὔ τι χερειότερον πέλει ἄλγος·
8.438
σοὶ δὲ καὶ εἰ μέμονε κραδίη τάδε μηχανάασθαι,
8.439
ἔρξον ἐμεῦ ἄπο νόσφιν· ἐλαφρότερον δέ μοι ἄλγος
8.440
ἔσσεται, ἢν μὴ ἔγωγε μετʼ ὄμμασιν οἷσιν ἴδωμαι·
8.441
κεῖνο γὰρ οἴκτιστον καὶ κύντατον, ὁππότε πάτρην
8.442
δυσμενέων παλάμῃσιν ἐρειπομένην τις ἴδηται.
8.443
ἦ ῥα μέγα στενάχων Γανυμήδεος ἀγλαὸν ἦτορ.
8.444
καὶ τότʼ ἄρα Ζεὺς αὐτὸς ἀπειρεσίοις νεφέεσσι
8.445
νωλεμέως ἐκάλυψε κλυτὴν Πριάμοιο πόληα·
8.446
ἠχλύνθη δὲ μάχη φθισίμβροτος· οὐδέ τις ἀνδρῶν
8.447
ἐξιδέειν ἐπὶ τεῖχος ἔτʼ ἔσθενεν, ᾗχι τέτυκτο·
8.448
ταρφέσι γὰρ νεφέεσσι διηνεκέως κεκάλυπτο·
8.449
ἀμφὶ δʼ ἄρα βρονταί τε καὶ ἀστεροπαὶ κτυπέοντο
8.450
οὐρανόθεν. Δαναοὶ δὲ Διὸς κτύπον εἰσαΐοντες
8.451
θάμβεον· ἐν δʼ ἄρα τοῖσι μέγʼ ἴαχε Νηλέος υἱός·
8.452
ὦ κλυτοὶ Ἀργείων σημάντορες, οὐκέτι νῶιν
8.453
ἔσσεται ἔμπεδα γυῖα Διὸς μέγα θαρσαλέοισι
8.454
Τρωσὶν ἀμύνοντος· μάλα γὰρ μέγα πῆμα κυλίνδει
8.455
ἡμῖν· ἀλλʼ ἄγε θᾶσσον ἑὰς ἐπὶ νῆας ἰόντες
8.456
παυσώμεσθα πόνοιο καὶ ἀργαλέοιο κυδοιμοῦ,
8.457
μὴ δὴ πάντας ἐνιπρήσῃ μάλα περ μενεαίνων.
8.458
τοῦ νῦν μὲν τεράεσσι πιθώμεθα· τῷ γὰρ ἔοικε
8.459
πάντας ἀεὶ πεπιθέσθαι, ἐπεὶ μάλα φέρτατός ἐστιν
8.460
ἰφθίμων τε θεῶν ὀλιγοσθενέων τʼ ἀνθρώπων·
8.461
καὶ γὰρ Τιτήνεσσιν ὑπερφιάλοισι χολωθεὶς
8.462
οὐρανόθεν κατέχευε πυρὸς μένος· ἡ δʼ ὑπένερθε
8.463
καίετο πάντοθε γαῖα, καὶ ὠκεανοῦ πλατὺ χεῦμα
8.464
ἔζεεν ἐκ βυσσοῖο καὶ ἐς πέρατʼ ἄχρις ἱκέσθαι·
8.465
καὶ ποταμῶν τέρσοντο ῥοαὶ μάλα μακρὰ ῥεόντων·
8.466
δάμνατο δʼ ὁππόσα φῦλα φερέσβιος ἔτρεφε γαῖα
8.467
ἠδʼ ὅσα πόντος ἔφερβεν ἀπείριτος ἠδʼ ὁπόσʼ ὕδωρ
8.468
ἀενάων ποταμῶν· ἐπὶ δέ σφισιν ἄσπετος αἰθὴρ
8.469
τέφρῃ ὑπεκρύφθη καὶ λιγνύϊ· τείρετο δὲ χθών·
8.470
τοὔνεκʼ ἐγῶ δείδοικα Διὸς μένος ἤματι τῷδε.
8.471
ἀλλʼ ἴομεν ποτὶ νῆας, ἐπεὶ Τρώεσσιν ἀρήγει
8.472
σήμερον· αὐτὰρ ἔπειτα καὶ ἡμῖν κῦδος ὀρέξει·
8.473
ἄλλοτε γάρ τε φίλη πέλει ἠώς, ἄλλοτε δʼ ἐχθρή·
8.474
καὶ δʼ οὔπω δὴ μοῖρα διαπραθέειν κλυτὸν ἄστυ,
8.475
εἰ ἐτεὸν Κάλχαντος ἐτήτυμος ἔπλετο μῦθος
8.476
τόν ῥα πάρος κατέλεξεν ὁμηγερέεσσιν Ἀχαιοῖς
8.477
δῃῶσαι Πριάμοιο πόλιν δεκάτῳ ἐνιαυτῷ.
8.478
ὣς φάτο· τοὶ δʼ ἀπάνευθε περικλυτὸν ἄστυ λιπόντες
8.479
χάσσαντʼ ἐκ πολέμοιο Διὸς τρομέοντες ὁμοκλήν·
8.480
ἀνέρι γὰρ πεπίθοντο παλαιῶν ἴστορι μύθων.
8.481
ἀλλʼ οὐδʼ ὣς ἀμέλησαν ἀποκταμένων ἐνὶ χάρμῃ·
8.482
ἀλλά σφεας τάρχυσαν ἀπὸ πτολέμου ἐρύσαντες·
8.483
οὐ γὰρ δὴ κείνους νέφος ἄμφεχεν, ἀλλὰ πόληα
8.484
ὑψηλὴν καὶ τεῖχος ἀνέμβατον, ᾧ πέρι πολλοὶ
8.485
Τρώων υἷες Ἄρηι καὶ Ἀργείων ἐδάμησαν.
8.486
ἐλθόντες δʼ ἐπὶ νῆας ἀρήια τεύχεα θέντο,
8.487
καί ῥα κόνιν καὶ ἱδρῶτα λύθρον τʼ ἀποφαιδρύναντο
8.488
κύμασιν ἐμβεβαῶτες ἐϋρρόου Ἑλλησπόντου.
8.489
Ἡέλιος δʼ ἀκάμαντας ὑπὸ ζόφον ἤλασεν ἵππους·
8.490
νὺξ δʼ ἐχύθη περὶ γαῖαν, ἀπέτραπε δʼ ἀνέρας ἔργων·
8.491
Ἀργεῖοι δʼ Ἀχιλῆος ἐϋπτολέμου θρασὺν υἷα
8.492
ἶσα τοκῆι τίεσκον· ὁ δ̓ἐν κλισίῃσιν ἀνάκτων
8.493
δαίνυτο καγχαλόων· κάματος δέ μιν οὔτι βάρυνεν,
8.494
οὕνεκά οἱ στονόεντα Θέτις μελεδήματα γυίων
8.495
ἐξέλετʼ, ἀκμήτῳ δʼ ἐναλίγκιον εἰσοράασθαι
8.496
τεῦξεν· ὁ δʼ ἐκ δόρποιο κορεσσάμενος κρατερὸν κῆρ
8.497
ἐς κλισίην ἀφίκανεν ἑοῦ πατρός, ἔνθα οἱ ὕπνος
8.498
ἀμφεχύθη· Δαναοὶ δὲ νεῶν προπάροιθεν ἴαυον
8.499
αἰὲν ἀμειβόμενοι φυλακάς· φοβέοντο γὰρ αἰνῶς,
8.500
Τρώων μή ποτε λαὸς ἢ ἀγχεμάχων ἐπικούρων
8.501
νῆας ἐνιπρήσῃ, νόστου δʼ ἀπὸ πάντας ἀμέρσῃ.
8.502
ὣς δʼ αὕτως Πριάμοιο κατὰ πτόλιν ἔθνεα Τρώων
8.503
ἀμφὶ πύλας καὶ τεῖχος ἀμοιβαδὸν ὑπνώεσκον
8.504
Ἀργείων στονόεσσαν ὑποτρομέοντες ὁμοκλήν.