Reader

IV. Litterae Rainaldi Remensis archiepiscopi de excommunicatione et absolutione Guiterii comitis Regitestensis. (Anno 1127.)[MARTÈNE, Thesaurus Anecdot., t. I, col. 367, ex chartario S. Remigii.]

Ego RAINALDUS Remensis Ecclesiae, licet indignus, minister, seriem causae excommunicationis simul et absolutionis Guiterii comitis de Reiteste( Réthel) ad posterorum memoriam hac praesenti pagina pertractare dignum studui. Excommunicaveramus praedictum comitem pro injustis consuetudinibus quibus villas S. Remigii, terras et homines opprimebat, et omnem quae ejus ditionis erat terram anathematis vinculo obligaveramus. Hac necessitate compulsus S. Remigii abbas Odo Romam expetiit, Honorio papae mala intolerabilia, quae comes ille Ecclesiae Sancti Remigii inferebat, exposuit. Domnus papa malorum motus acerbitate, excommunicationem in comitem nominatum factam confirmavit, et omnibus suffraganeis Remensis Ecclesiae episcopis, ut eam in comitem promulgarent litteris ad eos directis mandavit. Comes, hujus ignominiae opprobrium ferre non praevalens, praesentiam nostram adiit et satis lacrymosis precibus ut concordiam inter eum et abbatem componeremus nos exoravit. Accito abbate praedicto, aliis etiam abbatibus convocatis et quibusdam Ecclesiae nostrae clericis, causam praedicti comitis diu ventilantes, hoc tandem fine terminavimus. Guerpivit et abjuravit saepe dictus comes in praesentia nostra et totius curiae quod nullam ulterius in villis Sancti Remigii, exceptis hominibus suis capitecensis, exactionem faceret, quod vulgo tallias dicunt, nec ministeriales sui. Guerpivit etiam et abjuravit salvamentum quod a quatuor villis Sancti Remigii exigebat, videlicet a Salice S. Remigii( Saulx- Saint- Remi), a Roisiaco( Roizy), a Basilica- curte et Insula( Isle). Guerpivit et adjuravit lethum, sanguines, redhibitionem hominum Sancti Remigii, qui partes suas non accipiunt. Solitus erat idem comes hominibus suis dare homines S. Remigii, qui de advocatione sua erat. Qui injustis consuetudinibus eos veluti suos opprimebat, quod adjuravit ulterius se non facturum, nec defensor inde alicui existeret, nisi quantum ad advocationem suam pertinet. Haec omnia supradicta in praesentia nostra et totius curiae guerpivit et adjuravit praetaxatus comes, nisi forte si ad eum praepositus S. Remigii clamorem fecerit. Tunc de justitia quam ei faciet, tertiam partem habebit. Juravit praeterea quod pro his omnibus quae dimisit nullam malefacienti occasionem adversus villas et homines S. Remigii exercebit. Si vero aliquid supradictorum quae juravit infregerit, commonitus, nisi infra quindecim dies emendaverit, absque retractatione excommunicationi subjacebit. Praeterea de immodicis hospitationibus quas in villis S. Remigii nimis frequenter idem comes facere consueverat, et de operibus et carroperariis, quibus homines ecclesiae afficiebat, si clamor ad abbatem venerit, et commonitus in curia abbatis, si infra quindecim dies ad justitiam venire neglexerit, eidem excommunicationi cui modo subjacet sine dilatione subjacebit. Hanc igitur auctoritatis nostrae paginam ratam esse volentes, impressione imaginis nostrae idoneis etiam testibus subscriptis roborari fecimus. Signum Odonis abbatis S. Remigii. Signum Engubranni abbatis Altivillarensis. Signum Jorranni abbatis S. Nicasii. Signum Ursionis abbatis S. Dionysii. Signum Hugonis archidiaconi. Signum Joffridi decani. Signum Leonis cantoris. Signum Adae, signum Alberti, signum Odonis, presbyterorum. Signum Gervasii, signum Odonis, signum Drogonis, signum Bosonis, signum Joannis, diaconorum. Signum Albrici magistri. Signum magistri Graphionis Andegavensis de laicis, S. Hilarii de Monte- Gaii, S. Pagani de Calmisiaco, S. Otranni.

Actum Remis anno Incarnati Verbi 1127, indictione V, regnante venerabili rege Francorum Ludovico anno XXII, archiepiscopatus domni Rainaldi anno III.

Fulcradus cancellarius recognovit, scripsit et subscripsit.