Reader

VIII. Charta Rainaldi archiepiscopi Remensis, de confirmatione sancti Wlmari. (Anno 1132.)[ Gall. Christ., t. X, col. 400.]

Ego REGINALDUS, per Dei patientiam Remorum archiepiscopus, dilectis in Christo filiis PETRO ecclesiae Sancti Wlmari abbati venerabili, et caeteris fratribus in eodem loco canonicam vitam professis, eorumque successoribus in perpetuum.

Cum omnibus qui intra ambitum nobis commissae dioeceseos continentur vigilantiam debeamus, ad hoc potissimum nostra se accinxit industria, ut ecclesias et sanctorum locorum possessiones, quas laica invaserat ambitio, in pacem quietemque revocaremus, et a saecularium hominum illicita pervasione emancipatas, amatoribus Christi liberius subderemus. Ego igitur Raginaldus ad omnium tam praesentium quam futurorum notitiam protrahere studui, quod comes Eustachius timore extremi examinis prae oculis statuto, cum religiosa matre Ida et uxore nobilissima Maria, coram Joanne bonae memoriae Morinensi episcopo, jus omne quod habebat in ecclesiam Sancti Wlmari in civitate Boloniae sitam, liberum et absolutum Domino Jesu Christo concessit, eo videlicet tenore quod canonici secundum regulam sancti Augustini regulariter viventes, ibi substituerentur. Hanc ipsam donationem successor hujus comes Stephanus, cum uxore sua Mathilda, in praesentia domni Milonis successoris jam Joannis confirmavit, atque distributionem praebendarum, et jus omne quod in praedicta ecclesia post praefatam donationem injuste usurpaverat, restituit, et fratribus sub regula beati Augustini religiose in posterum victuris ibidem concessit. Vobis ergo, fratres charissimi in Domino ac filii, praefatam ecclesiam ejusque possessiones quas in praesenti possidet, vel in futurum possidebit et acquisitura est, vestrisque successoribus sub regula beati Augustini Deo militaturis metropolitana auctoritate confirmamus. Illud sane religionis, etc. Ut autem hujus schedulae continentia futuris temporibus rata et inconvulsa permaneat, probabilium personarum subnotatione et sigilli nostri impressione eam corroborari fecimus. Signum Josseni Suessionensis episcopi. S. Milonis Morinensis episcopi. S. Ursionis abbatis Sancti Dionysii. S. Hugonis abbatis de Monte Sancti Eligii. S. Baldumi abbatis Sancti Vincentii Silvanectensis. S. Joannis abbatis Beatae Mariae Boloniensis. S. Adae abbatis Sancti Judoci in Nemore.

Actum Remis anno 1132, regnante Ludovico rege Francorum anno XXVI regni sui, archiepiscopatus vero domini Rainaldi anno IX.