Reader

EPISTOLA XXIII. Rudolphus petit a summo pontifice Romano ut ultra prius mutuum det sibi tria millia marcar. mutuo ( An. Dom. 1275, cod. Rud. XXIII.)

ARGUMENTUM.-- Rudolphus acceptis a Gregorio duodecim marcharum millibus gratuito pro apparatu expeditionis in Syriam; alia tria millia sibi confici petit mutuo cum debita cautione. Praeterea ducem se elegisse strenuum scribit, quem propediem mittet cum copiis in Etruriam, quod petierat pontifex.

Si salva vestrae paternae benevolentiae reverentia loquimur, nullo in vestris piis praecordiis displicentiae spiritu excitato, de illa quodecim millium marcarum subventione gratuita, in qua nobis tam liberaliter providistis, et pro qua vobis ad grates uberrimas 334 filialis devotio se ferventer inclinat, videtur nobis ex verisimilibus conjecturis, quod ponderata negotii quod agitur magnitudine, ac inspecta temporis brevitate, tam grandi, tam celebri apparatui ipsa subventio aliquantulum insufficiens reputetur. Petimus itaque vultu verecundia et rubore resperso, quatenus ne praedicto negotio, quod post Deum potissime apostolica dextera dirigit, aliqua possit objici difficultas, praedictis duodecim millibus adhuc tria dignemini affluenter adjicere nomine mutui, prius tamen idonea cautione suscepta. Nos enim de capitaneo, seu rectore magnanimo, et circumspectione probato jam vobis providere curavimus, qui militiam congregans opportunam, ut praesit et prosit in Thuscia, consopitis vetustae calamitatis horroribus, ad eamdem provinciam diriget e vestigio gressus suos, etc.