Reader

EPISTOLA XXX. Petit a civitate quadam pro celebrandis comitiis imperialibus pecuniarium subsidium. ( An. Dom. 1275, cod. Rud. XXX.)

ARGUMENTUM.-- Cum diuturnum interregnum, aliis alia invadentibus, atque omnium nemine servitia debita solvente, aerarium imperiale in maximas angustias redegerit, Rudolphus comitia habiturus opem quaerit ab imperii civitatibus.

Fluctivagi jamdudum status imperii gravem lapsum, et miserabilis populi Christiani pressuras et gemitus amarissimo miserantes affectu, ut nostro felici tempore reipublicae reformata floriditas salutari pacatae quietis proficiat incremento....... Quapropter tali 345 die apud N. solemnem curiam duximus edicendam. Cujus utique celebrationi magnificae decenter providere regium condecet apparatum. Verum cum tanti negotii magnitudini, et ad tam grandis sarcinae supportanda molimina, et tam sumptuosae festivitatis agenda solemnia, per nos ipsos sufficere non possimus, oportet nos a vobis et aliis nostris fidelibus opportunum interpellare suffragium, et comportationis hujusmodi participio vos et ipsos fiducialiter onerare. Hinc est quod vestram prudentiam, qua possumus, exhortationis instantia duximus attentissime requirendam, quatenus tam evidenti necessitate perplexis, de tot marcis, ultroneis et hilaribus animis providere et subvenire curetis, in termino vobis a dilecto fideli nostro N. finaliter exprimendo, cujus etiam verbis, quae vobis nostro nomine pronuntianda decreverit fidem adhibere credulam vos petimus, sicut nostris. Exsurgat igitur grata semper et operose probata fidelium promptitudo, quae super hoc regalibus beneplacitis prompta et consueta benevolentia se coaptet. In aliis enim incommutabilis animi dispositione concepimus, sic allevationis antidoto, ut recompensationis vicissitudine, vestros animos complicare, quod revera gaudebitis, vos tam gratiosum obsequium gratis Domini usibus impendisse. Porro vestra prudentia non ignorat, quod regiae dignitati indecentia maculam, nec non vobis cederet nocumento, si, quod absit, necessariarum rerum cogente defectu, pro nostris debitis vos et alios nostros fideles contingeret pignorationis incommodo molestari. Datae.