Reader

402 EPISTOLA XXII. Fridericus archiepiscopus Salisburgensis absolvit suos dioecesanos a juramento praestito cuidam principi. ( An. Dom. 1276, cod. Rud. XXII.)

ARGUMENTUM.-- Archiepiscopus Salisburgensis provinciales suos a juramento fidelitatis absolvit, quo regi Bohemorum astringebantur; ac de suffraganeorum consilio se anathemate percussurum minatur quemcunque juramenti ejus obtentu non adhaerentem Rudolpho.

Fridericus Dei gratia, etc., omnis boni plenitudinem cum salute. Ex quo jurisjurandi sancta religio non est iniquitatis vinculum, sed confirmatio potius veritatis, viri prudentes et providi, de quorum vos numero aestimamus, illud plene intelligunt et faciliter apprehendunt, quod illustri principi N. per vos et alios praestita sacramenta adversus sacrum imperium, dominumque vestrum serenissimum, nec tenent, nec ligant vos, quod contra ducem et justitiam statumque reipublicae indebite sunt extorta; et quoniam eadem juramenta observari non possunt sine praejudicio vestrae salutis et mortali periculo animarum vestrarum, nos auctoritate Dei omnipotentis ipsa vobis remittimus et absolvimus, imo non esse ligatos denuntiamus ad observantias eorumdem. Nos etiam de consilio venerab. fratrum suffraganeorum nostrorum per excommunicationis sententiam adversus omnes et singulos procedemus, qui praetextu juramentorum taliter praestitorum in erroris concepti devio vagari magis elegerint, quam reduci ad semitam veritatis apertae, quam[ Fors., qua] Romanum imperium Deo jam praeduce nos praecedit.