Reader

EPISTOLA XVIII. Rudolphus commendat Coloniensem electum pontifici Romano. ( An. Dom. 1275, cod. Rud. XVIII.)

ARGUMENTUM.-- Siffridum canonice electum Coloniensem archiepiscopum multis effert laudibus apud pontificem Lugduni commorantem, oratque ut consecratum et sacro pallio de more ornatum ad suam sedem ingentibus obnoxiam calamitatibus quantocius mittat, nisi forte sublimiori loco exaltandum deliberaverit.

Inter caetera quorum nos pervigil cura sollicitat, quorum desiderabilis expeditio mentem nostram exagitat incessanter, illud revera tranquillo sanctae matris Ecclesiae statui, reformationi 448 divulsionis imperii, ac subsidio Terrae sanctae potissimum credimus expedire, quod ecclesiae regni Alemaniae destitutae pastoribus nova novorum sponsorum substitutione refloreant, et provisionis optatae solatio recreentur. Inter quas utique quanto praesignius cunctis veneranda Coloniensis ecclesia renitet, quanto etiam graviorum persecutionum procellis impetitur, et immaniorum perturbationum calamitatibus impulsatur, tanto celerioribus indiget vestrae paternae provisionis auxiliis sublevari. Et quia N. laudabili perhibente testimonio plurimorum, a juventutis suae primitiis semper fuit caterva virtutum stipatus, honestaeque conversationis et vitae praeconio insignis; pro eo beatitudini vestrae piissime supplicamus affectu quo possumus ampliori, quatenus cum ipsa ecclesia scienter expostulet suo salutari regimine dirigi, et amabili sua praesentia confoveri, eumdem electum ad ipsam ecclesiam gubernandam quantocius destinare dignemini ex innata paternae clementiae compassione celeriter expeditum, nisi forsitan ipsum sublimioris loci regimini, ad quod procul dubio reputatur idoneus, vestra pia circumspectio, suae multimodae probitatis obtentu decreverit deputandum. Speratur quippe certissime, quod per eum, velut per columnam immobilem fulcietur imperium, et in domo Domini idem electus nihilominus ut oliva fructifera germinabit.