Reader

VII.

CLEMENS episcopus, servus servorum Dei, dilectissimae in Christo filiae THEOPHILAE, monasterii Beati Petri in Paduana civitate siti abbatissae, et Dei ancillis inibi famulantibus, cunctisque inibi regulariter succedentibus in perpetuum.

Ex consideratione pastoralis curae, quam administratione sedis apostolicae gerimus, cui nullis propriis meritis sed divinae providentiae dispensatione praesidemus, omnium quae usquequaque sunt Ecclesiarum provectui nos convenit invigilare, ac justis fidelium postulationibus aequitatis assensum praebere, bonisque ac religiosis incoeptis, ut de die in diem augmententur, et ad perfectionem usque perducantur, nostri favoris nostraeque auctoritatis suffragium impertiri, quatenus personae Deo dicatae et divino cultu perpetuo jure mancipatae, ab omni saecularium inquietudine remotae et cunctis mundialibus impedimentis expeditae, pura et intenta mente Creatoris sui laudibus insistere teneantur. Unde, reverenda filia Theophila, quoniam sanctissima devotio tua, religiosis moribus suffragata, humiliter petiit ut praedictum Beati Petri monasterium nostri privilegii auctoritate firmaremus, quatenus omnibus futuris temporibus monasterium ancillarum Dei existeret, ut videlicet sanctimoniales, nullorum absque omni contradictione, sub regimine abbatissae degerent; devotas petitiones tuas per interventum honorandorum confratrum nostrorum Milonis, scilicet ejusdem civitatis episcopi, et Roberti Faventini episcopi, necnon dilectissimi filii nostri Petri Paduani archidiaconi, gratanter suscipimus, et tuis religiosis votis libenter annuimus. Quapropter apostolica auctoritate, et hujus nostri privilegii constitutione, concedimus et confirmamus ut omnibus deinceps futuris temporibus monasterium illud praedictum sanctimonialium monasterium habeatur, nec ulla sit deinceps magna parvaque persona quae hoc ullatenus audeat immutare. Confirmamus quoque eidem monasterio, tibique et omnibus tibi regulariter succedentibus ad usum sanctimonialium inibi Deo servientium omnia quae habentur in charta donationis quam episcopus Milo vobis fecit, et omnia quae nunc habetis, vel acquisistis, et quae deinceps, tam vos quam succedentes vobis, juste acquisiturae estis. Praecipimus insuper et apostolica auctoritate interdicimus ut nullus dux, marchio, comes, vicecomes, nullaque magna parvaque persona sive ecclesiastica, sive saecularis, praedictum monasterium Beati Petri, vel Dei famulas ibi servientes, de his quae hujus nostri privilegii auctoritate confirmamus, audeat deinceps ulla inquietudine molestare. Si quis autem hujus nostri privilegii sanctionem violaverit, nisi resipuerit, et digna satisfactione emendaverit, sit extorris a regno Dei, utpote apostolicae auctoritatis sacrilegus contemptor, et, digna excommunicatione damnatus, ab Ecclesia Dei prorsus extraneus efficiatur, perpetuaeque subjaceat maledictioni. At vero qui pius observator exstiterit, perpetuae benedictionis abundantia repleatur, constituimus.

Anno Dominicae Incarnationis 1091, indictione XIV, anno autem pontificatus domni Clementis III papae VII, XIV Kal. Februarii.

Datum per manum Bernerii vice cancellarii in urbe Paduana, actum feliciter.