Reader

IN EADEM ACTIONE. Et repertum [repetitum] est in actione septima.

CAP. XXV.-- Reprehensio. Non pertinere ad imaginum adorationem, ut illi dicunt, quod scriptum est: Jacob Pharaonem benedixit.

Responsio. Semper benedicere nos docet sancta Scriptura: Benedicite, et nolite maledicere. Item: Benedicite omnia opera Domini Domino( Daniel III), docemur: et rursus prostrati in oratione spiritaliter ante Sancta sanctorum psalmifice dicimus: Benedicat nos Deus Deus noster, benedicat nos Deus, et metuant eum omnes fines terrae. Quapropter si de divinae Scripturae benedictionibus exarare volumus, antequam sermo, ut opinamur, chartae cessabunt. Tamen unum vobis sancti Augustini addimus testimonium de ipso Jacob luctante cum angelo, ubi inter caetera inquit: Non dimittam te, nisi benedixeris mihi. Quia per carnem nos prius benedicit Dominus, norunt fideles, quid accipiunt, quia per carnem benedicuntur: sciunt quia non essent benedicti, nisi caro illa crucifixa daretur pro saeculi vita.