Reader

II. EXCERPTA QUAEDAM. CHAPITRE PREMIER.

Ci comence le livre des Assises et des bons usages dou royaume de Jerusalem, qui furent establies et mises en escrit par le duc Godefroy de Buillon, lequel fu ehleu à roy et à seignor doudit royaume, et par le conseil des autres roys, princes et barons que aprez le duc Godefroy furent, et par l' ordenement dou patriarche de Jerusalem.

Quant la sainte cité de Jerusalem fu conquise sur les ennemis de la crois, et l' an de l' Incarnation nostre Seignor Jesu Crist MXCIX. par un vendredy, et remise el pooir des feaus Jesu Crist par les pelerins qui s' ehmurent à venir conquerre la par le preschement de la crois, qui fu preschée par Pierre l' Ermite, et que les princes et les barons qui l' orent conquise orent ehleu à roy et à seignor dou royaume de Jerusalem le duc Godefroy de Buillon, et il ot receu la seignorie, et il ne volt estre sacré ne coroné à roy el dit royaume, por ce que il ne volt porter corone d' or la ou le roy des roys Jesu Crist le Fis de Dieu porta corone d' espines le jour de sa passion. Il fu ententis à mettre le royaume en bon point, et en bon estat, et que ses homes et son peuble, et toutes manieres des gens allans et venans, et demorans el dit royaume fussent gardés et governés, tenus et maintenus, et menés à justice, à droit et à raison. Il ehleut par le conseil dou patriarche de la sainte cité et yglise de Jerusalem, et par le conseil des princes et des barons, et des plus sages homes qu' il pooit avoir, sages homes à enquerre et à savoir des gens de diverses terres qui la estoient les usages de lors terres, et tout quant que ceaus que il ot ehleu à ce faire en porent savoir ne aprendre il mirent et firent metre en escrit, et aporterent cel escrit au duc Godefroy, et il assembla le patriarche et les avant dis, et lor mostra, et lor fit lire par devant eaus cel escrit, et aprez par lor conseil et par lor accort il concuilli de ceaus escris ce que bon li sembla, et en fit assises et usages que l' on deust tenir et maintenir, et user au royaume de Jerusalem, par lesquels il, ses gens, et son peuble et toutes autres manieres des gens alans et venans et demorans, fussent governés et menés à droit et à raison el dit royaume.

II. EXCERPTA QUAEDAM. CHAPITRE V. Cidit coment le seignor dou royaume de Jerusalem et les barons qui ont court, coins et justice doivent savoir les assises et usages doudit royaume.

Pour ce que il me semble droit et raison que le chief seignor dou royaume de Jerusalem, et les barons et les autres riches homes qui ont court, et coins et justice, sachent les assises et les usages dou dit royaume, que le chief seignor jure ains qu' il soit reçeu à seignor, ne oint ne sacré à roy de tenir les à son pooir, et faire les tenir en son royaume, et que tous ses homes et les homes de ses homes le doivent auci jurer, et pour ce que lors homes qui doivent estre juges de lor cors sachent bien et droicturierement juger les jugemens que il devront faire selon celles assises et ceaus usages, ci que je comance a faire cestui livre, tout soit ce que je conoisse bien qu' en moi ne n' a sene conoissance parque je le deusse enprendre à faire, mais la fiance et l' esperance que je ay en Dieu, et en la puissance de Dieu le Fis, et en la beneureté dou saint Esprit qui me donne sens et grace de bien faire le selon ce que j' ay apris et retenu de ceaus à qui je ais oy parler; et qui ont esté les plus sages homes de mon tens, à qui je ay oy parler des assises et des usages doudit royaume et des plais de ladite court, et por ce que lor ay vehu faire et user, l' ay je empris en faire, si en pri la sainte Trinite que elle m' envoit la grace dou saint Esperit, si que je puisse mener cestui livre à tel perfection qui soit à honor de Dieu, et au profit de m' arme, et au droit gouvernement dou peuble dou royaume de Jerusalem, selon les droites assises, et les drois usages doudit royaume, et au prouffit des armes et des cors de tous ceaus qui le liront, lesquels je prie et requiers et conjure de la part Dieu que il de chose que il ait n' en usent malement à tollir ne ehloigner le droit, ou celui d' autrui aprochier ou deffendre selon ce que mestier li seroit, car m' entention n' a esté, ne n' est de ce livre faire que pour enseigner ceaus que mestier en auront et auront droit et le requerront, de savoir le aprochier et desreigner, et à ceaus à qui l' on requerra ce que est lor droit, de savoir les ehloigner et dessendre, et pour ce il me semble que ains que je parle en cest livre des assises et des usages, ne des plais de la haute court doudit royaume, que je doie avant parler dou roy qui est chief seignor doudit royaume tout ne soit il corones, et les autres riches homes et barons qui ont el dit royaume court et coins et justice doivent estre, et que les juges et les pleideours et lor cors deviserai je au comancement de mon livre, ce que je ay empris à dire dou roy et des avant dis.

II. EXCERPTA QUAEDAM. CHAPITRE LXXXI. Des quels choses l' on ne se peut deffendre par l' assise ou par l' usage de aerdre se de bataille.

Ce sont les choses de que il y a bataille par l' assise ou l' usage dou royaume de Jerusalem dequoi l' on se peut deffendre par esgart ou par conoissance de court sans bataille. De murtre aparant murtre en court. De traison aparant. D' omecide aparant murtre en court. De querete d' nn marc d' argent ou de plus. De atraire contre son seignor chose que à son fié ne soit. Et de toutes autres choses qu' on pert vie ou membre, ou son honor qui en seroit attaint ou prové en la haute court.

II. EXCERPTA QUAEDAM. CHAPITRE LXXXII. Qués gens peuvent faire apeau de murtre, et à qui l' on est tenu de respondre

Pour ce que le murtre est avant divisé en cest livre que les autres choses dequoi l' on se peut clamer par l' assise et avoir en droit, et auquel clam il n' a point de jour, et y a tornes de bataille par l' assise ou l' usage dou royaume de Jerusalem en parlerai je premier, si veuil diviser avant quel maniere de gens peuvent faire apeau de murtre, vers qui on ne se peut deffendre de respondre dou murtre par l' assise ou l' usage dou royaume de Jerusalem. Feme espouse dou murtri. Hom espous de la murtrie. Tous parens et parentes de sanguinité. Tous parens et parentes d' afinité. Tous parains. Tous maraines. Tous fillous. Tous filleures. Tous comperes. Tous comeres. Tous ceaus et celles qui sont dou pais dou murtri, se il est pelerin estrange. Tous ceaus et toutes celles qui vindrent au passage à que il vint se il est d' outre mer. Tous ceaus et toutes celles qui ont esté avec le murtri ou la murtrie an et jour si com est devant dit. Tous ceaus ou celles qui sont tenus de foi au meurtri ou à la murtrie, soit home ou feme, ou seignor ou dame. Tous ceaus ou celles qui sont dou comun dou murtri ou de la murtrie, se il est de costume. Tous ceaus ou celles qui sont de la frerie dou murtri ou de la murtrie, se il est de la frerie. Feme se elle a esté soignant dou murtri. Home se il a tenue la murtrie à soignante.

Mais feme qui ait baron ne peut faire apeau de murtre que par l' otroi de son baron, et por ce le peut tel maniere de gens appeler et autres non, que il est bien semblant que amour les meine à ce que il font l' apeau pour l' amour qui a esté entre eaus et le murtri ou la murtrie, et non pour haine ou pour lover, ou pour malice.

II. EXCERPTA QUAEDAM. CHAPITRE CI. Coment toutes manières de champions doivent être armés quand il s' en vont pour offrir en court la bataille faire.

Ci est la maniere coment toutes manieres de geus, champions, chevaliers et autres doivent combatre, et coment il se doivent avant venir pour offrir au seignor et ou et coment, et de quel maniere il doivent estre armés, et venir à court pour offrir eaus de bataille, et coment et de quels armeures il doivent estre armés el champ et à la bataille el champ à cheval, coment et dequoi les chevaus doivent estre couvers.

II. EXCERPTA QUAEDAM. CHAPITRE CII Coment chevaliers doivent estre armés qui combatent pour murtre, et coment pour autre querele, et coment il doivent venir pour offrir, et ou et à quel oure.

Les chevaliers qui se combatent pour murtre ou pour homecide se doivent combatre à pié et sans coiffe, et estre roignés à la reonde, et estre vestus de cottes vermeilles ou de chemises, ou des doubles de coude courtes jusqu' au genouil, et les manches coupées jusques dessus le coude, et avoir chausses vermeilles de drap à estrier sans plus, et une targue que l' on appelle harasse qui soit plus grant de lui de demi pié, ou plain paume, en laquelle ait deus pertuis de commun au grant en tel endroit que il puisse son aversaire veir par ceaus pertuis, et doit avoir une lance et deus espées, l' une ceinte et l' autre attachée en son escu, si que il la puisse avoir quant mestier li sera, et il ni a que trois jours de respit de tel bataille, puis que les gages sont donés et receus. Et quant les champions qui ont gage tel bataille se veullent offrir à jour de bataille, il doivent venir à pié entre prime et tierce en l' ostel dou seignor, et l' apelloir avant ensi vestus et chaussés com il est dessus devise, et faire porter avant soi plusiors harasses et plusiors lances et espées, si que il puisse prendre à l' entrée dou champ lequel que il vodra, car se chascun ne presentait que une, et elle estait brisée fenduë ou empirée en aucune maniere ains que il fust au champ, il ni poroit avoir nule autre puis fors celle que il aurait presentée au seignor et à la court et l' apeloir se doit venir avant pour offrir, et dire ce quant il sera venu enci en la court dou seignor. Sire, je me presente moi et mes armes à vous et à la court, et vees ci mes armes et mostrer les, et moi pour euffrir à fornir ce que je ay offert à faire, et à fornir de la bataille que je ay gagée contre tel et le nome. Et lors le seignor doit faire toutes ses armeures veir à la court se elles sont telles com elles doivent estre, et puis livrer les armeures à ses homes et comander as champions que il allent el champ, et ceaus qui portent les armeures o lui. Et le defendoir doit apres venir pour offrir soi si com est dessus dit de l' apeloir, et le seignor doit auci faire et dire à lui com à l' apelloir, et se l' une des lances est plus longue que l' autre, le seignor la doit roigner dou grant, et doit les deus champions faire bien garder alant el champ que aucun des eaus ne s' en fuie ou destourne, ne que l' on lor face mau ou vilainie dou cors, ne die ne face honte ne ennui, car le seignor les doit de ce tout faire garder, que il sont en sa garde. Et quant il seront el champ le seignor y doit metre de ses homes pour les garder, et un des eaus doit dire devant les autres à chascun des champions, choisisses de vos armeures, lesqueles vous vodrés avoir à la bataille faire et il le doivent faire et doivent telles retenir el champ, et les autres oster del champ. Et aprés doivent faire jurer à chascun des champions que il ne porte bref ne charei, ne sorcerie, ne que il pour ceste bataille il ne l' a fait faire, ne autre pour lui que il sache, ne n' a doné ne promis à aucune persone quel qu' elle soit en aucune maniere chose pour brief ou espirement, ne charei, ne sorcerie qui à celle bataille li puisse aidier, ne à son aversaire nuire, ne que il n' a aucunes autres armeures sur soi que celles que la court a vehues. Et puis doivent les champions mener ensemble emmi le champ, et avoir là un Evangile, et le deffendoir doit premier jurer sur sains à genouil la main destre sur l' Evangile, et dire que enci li ait Dieu et les sains Evangiles que il n' a tel murtri et le nome. Et l' appeloir doit dire que il ment et l' en doit liever com esparjur et prendre par le poing, et jurer que enci il ait Dieu et les sains Evangiles, que il a tel murtri, et le nome. Et aprés ce les gardes doivent mener chascun des champions en une part dou champ, et le banc doit estre crié tel à quatre cantons dou champ, que ni ait nul si hardi de quel langage qu' il soit qui ose dire ne faire chose par quoi l' un de ces deus champions soit en aucune chose aidiés ne veés, ne estre ne le puisse, et que se aucun le faisoit que son cors et son avoir seroit encheu en la merci dou seignor. Et se le murtri est empresenté il doit estre en une part dou champ tout descouvert, et se il y a home ou feme qui ait fait l' apeau par champion, il doit est e de les le cors, en tel maniere que il ne nuise ne aide à nul des deus parties ne en dit ne en fait, ne en contenance fors de Dieu proyer, on tel maniere que les champions ne le puissent oyr. Et les armeures dou vaincu, et celles qui cheent dou vainquor brisées et entieres doivent estre dou seignor, et s' il y a conestable, dou conestable; et se pais en est faite puis qu' il sont laissés aler ensemble, et aucune des armeures douquel que ce soit est brisée ou chiet au champ, elle est dou seignor, ou dou conestable se il y est. En apres les gardes dou champ doivent partir le soleil si que il ne soit contre la chiere de l' un plus que de l' autre, puis doit dire l' un des gardes au seignor sire, que comandes vous, nous avons fait quan que nous devons faire. Et le seignor lor doit dire lors laissés les aller ensemble, et traire se en une part dou champ, et laisser les convenir; et se le champion porte arme reporte autre que celle de la court, et il s' en veaut aidier pour son aversaire gregier, et les gardes dou champ s' en aperçoivent, si le doivent maintenant prendre, et le seignor en doit faire dou murtrier, et se l' un prend l' autre, et il s' entre abatent, les gardes dou champ se doivent traire celle part, et estre plus pres que il porront des yaus, si que se l' un dit le mot dou recreant que il puissent l oyr, et se il le dit et il l' oyent, il doivent maintenant dire à l' autre laissés, assés avés fait, et maintenant celui prendre et laisser un commandement dou seignor, et le seignor le doit maintenant de la faire trainer jusques as forches et pendre le par la goule et de celui qui aura esté occis tout n' ait il dit le mot recreant.

Et qui veaut faire apeau de murtre et il n' est chevalier, il doit faire si com il est devant dit de toutes choses fors tant que les champions doivent estre autrement armés, et enci et tels armeures com est devisé en cestui livre et aprés que les champions autres que chevaliers doivent avoir, car sergens à pié se combatent de toutes quereles d' unes armeures.

II. EXCERPTA QUAEDAM. CHAPITRE CIV. Coment au jour de bataille se doivent offrir les champions.

Au quatrieme jour des champions se doivent venir offrir en l' ostel dou seignor entre prime et tierce l' apeloir avant et le deffendoir apres et doit chascun des eaus avoir plusiors chevaus couvers si com est devant devisé, et faire aporter des armeures avant dites de chascune plusiors: porce que se il ni portoit que une, et il ni faisoit mener que un cheveau, et celui fust mort ou essoigné, ou aucune des armeures fust mau mise ou empirée, il n' en poroit avoir, ou recouvrer d' autre puis que il l' auroit presenté à court. Et quant l' apeloir vient devant le seignor, il li doit dire. Sire, je suis venu au jour que vous et la Court m' avés doné garant et apareille de ce que mestier me ait a ma bataille fournir, et euffre à ma bataille faire en fait ce que je ay offert à faire en dit, et vous prie et requiers que vous comandés que je aille au champ ma bataille faire. Et le seignor doit dire, soffrés vous en tant que je le vous commande. Et adonc il doit se traire en une part en l' ostel dou seignor, et quant le deffendoir vient devant le seignor, il doit enci faire com il est dessus devisé de l' apeloir. Et quant il se sont enci venus pour offrir, le seignor doit comander devant à l' apeloir que il voise au champ, et apres au deffendoir, et doit à chascun bailler de ses homes qui les accompagnent jusques au champ, et qui les gardent que nus des eaus ne s' en destourne: ne que on ne lor die, ne fasse mau ne vilenie, ne outrage, mais quant il viendront pres d' ou champ chascun d' eaus doit avoir tentes tenduës ou loges faites hors dou champ là où il s' arment, et le seignor doit là venir, ou ses homes, et là establir de ses plus prodes homes au champ garder, et doit avoir assés de ses homes armés entour le champ pour garder que tort, ne force, ne otrage ne soit fait à sa seignorie, ne a aucun des champions. Et quant il sont là venus, le seignor doit faire venir les champions devant lui, et dire à chascun lequel est le cheval que vous volés avoir a combatre, où sont vos armeures de qui vous volés combatre, et ils les doivent mostrer, et le signor les doit faire prendre et faire veir en sa court se elles sont telles com elles doivent estre a tel fait faire; et lors la court doit les lances mesurer, et se l' une est plus grant que l' autre roigner la, si qu' elles soient d' une grandeur, et se l' une des espées ou le fer des lances est tel que il puisse passer par la maille dou haubert sans rompre et tailler la maille, l' on le doit faire changier que il ne les aient tels com est devant dit qu' elles doivent estre. Et quant cela sera fait, le seignor doit dire as champions que il s' en voisent armer de toutes lors armes fors de heaume et de la lance. Le seignor doit comander à ses homes que il les metent au champ, que l on mene devant eaus lors chevaus, et portent lor escus et lor lances et lor heaumes, et entrent à pié el champ, et mener les a une part chascun par soi. Et quant ce sera fait, ceaus des homes que le seignor a establi a garder le champ doivent porter une Evangile, et faire jurer à chascun des champions par soi que il ne portent sur eaus ne sur lors chevaus armeures parquoi il puissent l' un l' autre gregier autres que celles que la court a vehuës, ne que il ne portent que il sachent sur eaus ne sur lors chevaus brief ne chartre, ne sorcerie ne autre pour eaus que il sachent. Et apres ce sarement il doivent faire venir les deus champions emmi le champ, et avoir une Evangile que un des gardes dou champ doit tenir, et doit dire au deffendoir venés avant, et jurés ce que vous devés, et il se doit agenouiller et metre la main sur l' Evangile et dire enci, m' aid Dieu et les sains Evangiles que je n' ay pas faite la traison que cestui me met sus, et le nome, et l' apelloir le doit maintenant prendre par le poing, et dire tu es esparjure, et je t' en lieve com esparjure, et jure que enci m' aid Dieu et ses sains Evangiles que tu as comise la traison que je te meis sus. Et adonc les gardes dou champ doivent mener chascun des champions en une part dou champ et comander que le ban soit crié és quatre parties dou champ, et doivent chascun des champions faire monter sur lors chevaus, et adonc baisse son heaume, et prendre son escu en sa tente, et les gardes doivent tenir chascun des champions par le frain dou cheval; et les autres doivent partir le soleil, et quant le soleil sera parti, et le banc crié, il doivent dire au seignor qui doit estre hors dou champ à cheval. Sire nous avons fait quau que nous devons, que comandes vous, et le seignor lor doit dire laissés les aler ensemble, et lors ceaus qui les tienent les doivent laisser aler, et l' un doit movoir contre l' autre et faire le meaus qu' il sauront, et se aucun des champions porte armeure, et il l' a trait pour son aversaire gregier, il en doit estre fait com il a esté dit là où il parle dou murtre et d' omecide. Et celui qui sera mort ou recreant el champ, le seignor le doit faire trainer et pendre, et le cheval et les armes dou vaincu doivent estre dou conestable, et celles dou vainquor qui sont brisées et chieent el champ, et se pais est faite de la bataille puis que les champions s' en sont laisses aler ensemble, toutes les armeures qui sont cheus el champ brisées et entieres doivent estre dou conestable, et s' il ni a conestable doivent estre dou seignor. Et se celui qui est appel é de la traison est vaincu, il est attaint de la traison, car l' on li a provée si com l' on doit, si doivent estre ses heirs desherités com heirs de traitour ataint et prové de traison, et se le seignor veaut avoir le fié, et celui qui est attaint et prové de la traison si com est devant dit com il aura esté otrée, et la justice en sera faite, il doit faire assembler la court, et doit dire coment tel et le nome fu appellé de traison, et que il en a esté attaint com celui à qui l' on l' a prové par bataille, et qui en a esté vaincu par bataille, si requiert à sa court que elle li connoisse se ses heirs en sont desherités del fié de celui qui a esté attaint de la traison, par ce que l' on li a prové en champ par bataille, et la court doit connoistre se cuit que ses heirs en sont desherités del fié que il tenoient de lui, et de tout quauque par lui lor est escheu si com heirs de traitour aparant, et attaint et prové de traison. Et lors le seignor peut faire saisir son fié et avoir le et faire tenir, et faire en toutes ses volontés com dou sien que enci l' a eu par esgard ou par conoissance de Court.

II. EXCERPTA QUAEDAM. CHAPITRE CVII. Qués gens se pevent deffendre par champion.

Se sont les gens qui se pevent deffendre par champion, feme, home mahaigne, home qui a passé aage de soixante ans, et se lor champion est vaincu, il sera d' ambedeus fait si com est dessus dit.

II. EXCERPTA QUAEDAM. CHAPITRE CIX. Coment toutes autres manieres de gens autres que chevaliers qui gagent bataille doivent estre armés à la bataille faire.

Toutes manieres de gens autres que chevaliers pour quelque querele que ce soit se doivent combatre a pié en bleant, ou en cotes rouges et chausses à estrier, et braies et braier tel com est use que champions à pié les ont, et estre roignés à la ronde, et avoir chanevas et bastons de champions, et qui avoir ne les peut, si ait autres bastons qui soient d' un lon, et les armeures dou vaincu et dou vainquor seront faites en la maniere devant dite, et apeau qui est fait de murtre ou d' omecide ne n' a respit dou jour que les gages sont donés et resseus jusques au jour de la bataille, que trois jours, et de toutes autres quereles jusques au jour de la bataille quarante jours, et au jour que il lor est doné de bataille par le seignor ou par la Court, il doivent venir et eaus offrir en l' ostel dou seignor apareilles enci com est devant dit en cestui livre que le seignor le doit faire, et quant il seront au champ, les seremens et les bans, et les autres avant dites choses doivent faire faire les gardes dou champ si com est avant devisé en cestui livre.

II. EXCERPTA QUAEDAM. CHAPITRE CX. Que les seignors doivent faire quant pere ou fils, ou deus fraires tendent lor gages l' un contre l' autre.

Il est assise au royaume de Jérusalem que le seignor ne doit recevoir les gages de père à fils, ne de fils à père, ne deus fraires l' un contre l' autre.