Reader

LIBER QUINTUS TROPOLOGIAE IN LAMENTATIONES JEREMIAE. HE.

VERS. 13.--« Misit in renibus filias pharetrae suae.» He, interpretatur salus. Quid enim salubrius quam semper urgeri divinorum verberum timoribus? Filiae pharetrae ad litteram nil aliud sunt quam sagittae. Filias pharetrae in renibus mittit, cum superni consilii sententiis cogitationum, vel etiam corporis nostri delectamenta configit.

VERS. 14.--« Factus sum in derisum omni populo meo, canticum eorum tota die.» Fit in derisum populo suo, cum ipsae cogitationes nullos coepti sui bonos successus spondent spiritui suo. Tota die eorum canticum fit, cum frequentia cogitationis quidquid boni propositi arripitur, quasi mox transiturum in vulgi fabulam, in modum cujuspiam ludicri, arbitratur.

VERS. 15.--« Replevit me amaritudinibus, inebriavit absinthio.» Amaritudinibus repletur, qui perpetratorum facinorum poenitudinibus sed momentaneis coarctatur. Inebriatur absinthio, qui appetitu exardescit et ingemiscit admisso. Voluptatum enim, ait quidam, appetentia plena anxietatis est, satietas vero poenitentiae.