Reader

II. Petri Pictaviensis episcopi charta confirmans omnes possessiones monasterii Fontis Ebraldi. (Anno 1106.)[COSNIER, ubi supra, p. 146.]

Ego PETRUS, Dei gratia Pictavorum episcopus, quieti sanctae Ecclesiae providens, et in ipsa pacem formare, et altercandi occasionem sopire desiderans, Ecclesiae sanctae Dei Genitricis de Fonte Evraudi, quam frater noster Robertus de Herbressello vir religiosus, verbo sanctae praedicationis deditus, nostro tempore in nostra dioecesi fundavit; domnus Paschalis apostolicus auctoritate sui privilegii munivit; ea quae modo possidet, quae pro suarum salute animarum subscripti homines sibi dederunt, quiete in perpetuum possidenda sine reclamatione alicujus, vel personae, vel Ecclesiae concedo et confirmo; scilicet terra in qua ipsa ecclesia fundata est, quam dederunt praedicto Roberto Aremburgis et Adelaidis filia ejus, a terra Berlai quae supra fontem est, sicut via publica dividit, usque ad secundum molendinum; praeterea tantum terrae quantum quatuor boves possunt excolere in duobus temporibus, et terram quam dederunt praefatae ecclesiae Hugo filius Gregorii, et Berlaius de Monsteriolo, et uxores eorum et filii a terram Guidonis Osmundi filii usque ad boscum Milonis de Tuille, et usque ad closum S. Martini, usque ad terram Sanctae Radegundis; et totum nemus usque ad ulmum de Maistre; insuper omnes consuetudines quas praedictae ecclesiae dedit Gauterius de monte Sorelli, quascunque homines hujus loci facturi erant per totam terram de Logiis; concessit et vigeriam, et alias consuetudines quas habebat Gauterius in illa terra, omnes pro amore Dei eidem ecclesiae dedit, et quidquid homines ipsius Gauterii huic ecclesiae dare voluerint( salvo suorum militum servitio), et quicunque dabit huic loco terram in silva Borni, dedit eidem ecclesiae idem Gauterius secretariam suam, et vigeriam suam et omnes consuetudines suas. Haec autem huic ecclesiae data, auctoritate nostra confirmamus, ut in perpetuum quiete possideant; et si quis contra haec machinari aliquid praesumpserit, anathematis gladio feriatur, et illius machinatio irrita deficiat. Hoc venerabilium canonicorum nostrorum consilio egimus.+ S. Petri Pictaviensis episcopi S. Petri archidiaconi. S. Willelmi archidiaconi. S. Raginaudi succentoris. S. Willelmi magistri scholae S. Rainerii archipresbyteri S. Willelmi Aleelmi. S. Ularii. S. Willelmi. S. Joannis.

Data Pictavi in camera, anno ab Incarnatione Domini 1106, indictione XIV, epacta XIV, papa Paschali, Petro Pictaviensi episcopo, Philippo Francorum rege, Willelmo Aquitanorum duce.