Reader

385 EPISTOLA XII. Rudolphus respondet episcopo Salisburgensi, gratias ipsi agens pro singulari ejus circa ipsum cura ac vigilantia. ( An. Dom. 1276, cod. Rud. XII.)

ARGUMENTUM.-- Rudolphus trinis archiep. Salisburg. litteris praecedentibus respondet ex castris post comitia Campiduni habita, gratias illi agens plurimas de loquendi agendique sinceritate et constantia. De Ottocari calliditate aliquid innuit, caetera litterarum latori oretenus edicenda se ait commisisse.

Super tam pura et integra vestrae amicitiae incontaminata ferventia, quam ad nos promptissima mentis alacritate portenditis, aliena verborum argumenta non quaerimus, ubi effectus operis dicto praeponderans, certa nobis experimenta dilucidat, et conscientia nostra testis quantalibet testium depositione solemnior interpellat. Scimus etenim, imo indice facto probavimus, quod in vestris praecordiis erga nos concepta non algeant, sed quo plus labuntur in tempora, eo gratiosius adolescant. Patet hoc utique clarius omni claro per ea quae missae nobis vestrae litterae continebant. Ex quarum tenore probabili conjectura perpendimus, circa latera nostra vigilantis vos vigilis officium exercere, et regalium excubiarum negotium tam salubriter quam fideliter adimplere, cum nihil possit nobis occurrere tam tempestuosum, tam turbidum, tamque luci impervium et opacum, quin vestrae luminosae prudentiae jubare serenetur. Super his igitur salutaribus vestris monitis et reformatione gratuita, quibus nos utiliter instruxistis, paternitati vestrae grates et gratias exsolventes, et propter haec et alia dulcifluae vestrae bonitatis et voluntatis indicia, nos et nostra quibuslibet vestris nutibus exponentes, de nostrae prosperitatis eventibus, quos audire libenter vos credimus, vestris desideriis 386 duximus haec pandenda. Quod curiam nostram solemnem in tali loco, et tali die, copiosa nobis principum assidente caterva, et praeelectae stipati militiae comitiva, cui temporibus nostris vix est visa consimilis, celebravimus condecenter in regio potentatu, constitutionibus congruis pluribus editis, cingulo militari multis tyronibus decoratis, et omnibus aliis quae sedentem in throno regem magnificant et regalem exornant curiam rite actis, et de contingentibus nil omissis, licet sedentis ab aquilone regis Bohemiae calliditas visa fuerit in occulto, cum nequiret in publico nostris tam celebribus obviare progressibus, tamque proficuis et festivis solemniis intentatione[ in tentatione] nefaria contraire; quae[ qui] tamen dextera Domini faciente virtutem, in sua defecit astutia, non profecit. Caetera vero dilectus familiaris[ famulus] noster N. praesentium exhibitor explicabit lucidius oraculo vivae vocis.