Reader

XXVI. Charta super Christianitate Remensibus canonicis concessa. (Ann. 1201.)[VARIN, Arch. admin. de la ville de Reims, t. I, p. 445.]

WILLELMUS Dei gratia Remensis archiepiscopus, S. Romanae Ecclesiae tituli S. Sabinae cardinalis, omnibus qui praesentes litteras viderint, salutem in Domino.

Cum a retroactis temporibus et antiquis, Remensis Ecclesiae honestate vitae semper et morum compositione floruerit et inter Ecclesias Gallicanas speciali quadam praerogativa praecellere merito videatur, attendentes quoniam praecipue honestatis Ecclesiam praecipuis decet et plurimis libertatibus honorari; pro honore Ecclesiae augmentando et pace servanda, praedictae Ecclesiae, duximus indulgendum, ut in villis suis et bannis tam propriis, quam illis quae cum aliis habet communia in nostra dioecesi constitutis ad universitatem capituli pertinentibus, plenae justitiam Christianitatis obtineat; salvis nobis omnibus presbyterorum et clericorum justitiis, item sacrilegiorum omnium et matrimonialibus omnibus causis et retenta nobis terrae canonicorum Remensis civitatis, sicut hactenus est obtentum, justitia Christianitatis, item appellationibus nobis in omni negotio reservatis: sed cum ad nos fuerit appellatum, appellatio quidem tenebit, et praesente capituli nuntio, si adesse voluerit, in curia nostra tractabitur causa; in cujus processu, si poena pecuniaria, prout in causis fieri solet, inciderit, nec remittere poterimus, nec nostris rationibus applicare; sed in solidum ad ecclesiam pertinebit. Licebit tamen capitulo super presbyteros et eorum capellanos pro suis justitiis, nisi eis obedierint, poenam condignam imponere, quam nisi injuste latam, non poterimus revocare. Porro de hominibus vel hospitibus suis qui non in suis, seu[ sed] alienis bannis morantur, id decernimus observari ut pro omnibus rebus ad ecclesiam spectantibus, eos possint per Christianitatem citare, citatosque pro rebus, ut dictum est, ad suas consuetudines et jura spectantibus convenire, et in eos ac domos ipsorum, atque familias, si expedierit excommunicationis vel interdicti sententiam promulgare et presbyteros tam in suis villis quam in aliis constitutos, si eis in hac parte obedire noluerint sententia condigna percellere, quas sententias a canonicis promulgatas nisi injuste late fuerint, usque ad condignam satisfactionem nobis erit illicitum relaxare, quae omnia, salvo jure archidiaconorum, duximus concedenda. Cujus rei series ne memoriam humanam effugiat, vel( quod absit!) malignitate mutetur, eam litterarum et sigilli praesentis patrocinio in perpetuum confirmamus.

Datum Anagniae per manum Matthaei, cancellarii nostri, anno Verbi incarnati 1201, mense Januario.