Reader

VITA BONI. CAPUT UNICUM. Episcopis Ravennatibus icones positae. Rursus ad episcopos Paraenesis. Boni mors, et sepulcrum.

Bonus XXXIII. Iste nomine, et operibus simul, macilenta et rubea effigie, plano capillis capite, canitie ornatus, et omni gratia plenus. Et si fortasse quis secum cogitans dicat, aut alios interroget, quomodo iste, vel unde scire poterat horum sanctorum effigies quales fuerint, si macilenti, si pingues, nulla dubitatio inde adcrescat, quia pictura insinuat mihi illorum vultus. Ab istius tempore vexationes gentium coeperunt crescere, et fluctus illidere; sed iste de oratione assuetus non cessabat preces assidue Deo dare. Pro fidelibus orabat, ut perficerentur, pro infidelibus, ut ad gratiam pervenirent, quia antequam destruatur mundus, omnes ad Christum concurrent. Audi David: Reminiscantur et convertantur ad Dominum omnes tribus terrae, et adorabunt ante conspectum gentium. Videte quomodo ante judicii diem omnis mundus post Christum ibit, et adorabunt solum Deum viventem in saecula saeculorum. Dic et caetera, o rex: Et adorabunt eum omnes reges terrae, et omnes reges servient ei. Et Paulus apostolus clamat: Donec plenitudo gentium introierit, et sic omnis Israel sulvus fiet. Et quare non credunt modo? Quia eorum obdurata sunt corda, et clausa sunt viscera. Illud velamen, quod Moyses habuit in facie, illorum infixum est cordibus. Et si velatum cor habent, quomodo ergo Ezechiel clamat: Auferam cor lapideum de carne vestra, et dabo vobis cor carneum, et scietis quia ego Dominus? Data sunt illis carnea corda, sed duritia illa semper in eis adcrescit. Audi Apostolum: Secundum duritiem autem tuam et impoenitens cor thesaurizas tibi iram in die irae, et indignationem justi judicii Dei, qui reddet unicuique secundum opera sua. De eorum duritia audi ipsam Veritatem: Potens est Deus de lapidibus istis suscitare filios Abrahae. Apud Deum omnia possibilia sunt. Et quare non suscitavit? Si voluit, quis contradixit ei? Cum solus omnium donator[ dominator] suscitavit sanctos apostolos, qui ex Abrahae propagine fuerunt, cujus vos imitatores estis, et eorum gestatis figuram. Recordamini solicite, rogo, sanctae Ecclesiae inspectores, quamvis sublimem teneatis sedem, tamen mortales estis, semper soliciti, semper pavidi. Audite per prophetam: Vos sicut homines moriemini, et sicut unus de principibus cadetis. Et filius praedicti pro phetae: Beatus homo, qui semper est pavidus; qui vero mentis est durae, corruet in malum. Obiit autem hic beatissimus praesul die VII Kal. Septembris in senectute bona, sepultusque est in pace in basilica S. Apollenaris sacerdotis et martyris in Classe. Sedit autem annos........ menses........ dies........

VITA BONI. OBSERVATIONES AD VITAM BONI. Episcoporum effigies in ecclesia apponi solitae. Item Augustorum. Saracenorum coeptae incursiones.

In hujus pontificis Vita nil fere observatione dignum. Noster cum nil de Bono narrandum habeat, pro suo more convertitur ad suorum temporum vitia. Illud auctoris fidem utcunque commendat, quod ne quis dubitaret de cujusque episcopi corporis habitu, quem describere solet, id se ait ex eorum imaginibus pictura expressis didicisse. Licet autem( quod ex hoc Agnelli Libro Pontificali innotescit) ut minimum a Valentiniani Martiani praedecessoris aetate solerent in basilicis earumque porticibus honoris causa episcoporum imagines pingi, id tamen solemnius obtinuisse circa haec Boni tempora videtur, quibus orthodoxi episcopi, sicut in diptychis scribebantur, sic in sacris aedibus picti locum habebant. Hinc Anastasius in Agathonis Vita ait, quod in sexta synodo Patres, Monothelitis damnatis,« abstulerunt de diptychis Ecclesiarum nomina patriarcharum, vel de picturis ecclesiae figuras eorum, aut in foribus, ubi illae esse poterant auferentes, id est Cyri, Sergii, Pauli, Pyrrhi, Petri, per quos error orthodoxae fidei usque nunc pullulavit.» De Joanne etiam VII haec habet:« Fecit vero et imagines per diversas ecclesias, quas quicunque nosse desiderat, in eis vultum depictum reperiet.» Id etiam honoris tributum Augustis utriusque sexus, tum alibi, cum Ravennae plura ostendunt ex passim relatis in hoc Pontificali, usque a Valentiniani Placidiaeque temporibus, et infra, ex Damiani episcopi actis. Facile et haec illustrantur ex historia haeresis Iconoclastarum, quae octavo saeculo Ecclesiam turbavit.

Quod ait noster,« ab istius» episcopi« tempore» vexationes gentium esse coepisse, manifesto ex his quae subsequuntur apparet ad Mahometanam sectam, Arabumque in Romanum imperium, et in Hispaniae Italiaeque perniciem armatorum, initia spectare. Serius tamen haec Ravennam afflixere. Vide Baronium, ad annum 630 et seq.